Paci di Cataviddotta

La paci di Cataviddotta fu n'accordu fattu lu 31 di austu1302 'n cuntrata Vigna di Corti, ammeri Cataviddotta (AG), tra Carlu di Valois, comu capitanu ginirali di Carlu II d'Angiò, e Fidiricu II di Sicilia; ss'accordu chiudìu praticamenti lu primu pirìudu dê Vespri siciliani e dê guerri tra Aragunisi e Angiuini pû pussessu di l'Italia miridiunali.

Secunnu arcuni pi la cuncrusioni di l'accordu, si ntirissò macari lu papa Bonifaciu VIII, ma pâ storia stu fattu nun è sicuru.

L'accordu limitava lu regnu di l'Angiuini ô miridiuni cuntinintali di l'Italia e diceva ca Fidiricu II di Sicilia puteva cuntinuari a rignari ntâ Sicilia, ma cô titulu di Re di Trinacria e non dâ Sicilia e nta l'ìsuli vicini comu re ndipinnenti e assulutu, ma stabbiliva macari ca la Sicilia havìa turnari sutta la duminazzioni di li angiuini doppu la morti di Fidiricu II. Ssu fattu, pirò, nun s'eppi mai, picchì l'Aragunisi nun lassaru la Sicilia: foru, anveci, prutagunisti ntâ mitati dû XV sèculu di la cunquista macari dû Regnu di Nàpuli, cu Alfonzu V d'Aragona, chiamatu lu magnànimu, ca nta la fini dô 1442 strappò la curona a Rinatu d'Angiò, ùrtimu di li Re angiuini.

Lu titulu di Re di Sicilia ci aspittava ancora a li angiuini, e la palora scigghiuta pi nnicari lu regnu ntâ parti cuntinintali fu nfatti chidda di "Regnu di Sicilia a cca banna dô faru". Cu tuttu chissu, cu la paci di Cataviddotta, nasciu de facto lu Regnu di Nàpuli.

Ssu trattatu di paci, tra l'àutri cosi, stabbiliva ca Fidiricu s'havìa maritari Eleunora, soru dô duca di Calabbria Robertu d'Angiò e figghia di Carlu II. La paci di Cataviddotta eppi fini quannu Fidiricu dumannò lu titulu di Re pi sò figghiu Petru. Ci forù àutri anni di guerra picchì Robertu cuntinuò a circari di ripigghiari pussessu di l'ìsula ntô 1314, mprisa nun arrinisciuta pi l'angiuinu.

Mappa storica Storia dâ Sicilia Tempi di Selinunti
pristoria | èbbica finicia | èbbica greca | èbbica rumana | èbbica vànnala | èbbica gòtica | èbbica bizzantina | èbbica àrabba | èbbica nurmanna | èbbica sveva
èbbica angiuina | èbbica aragunisa | èbbica spagnola | èbbica piemuntisa | èbbica burbònica | èbbica cuntimpurània