Arbergu
N'arbergu, o hotel, è na mprisa ricittiva ca furnisci n'alloggiu previu paiamentu, utilizzatu solitamenti pi suggiorni di durata brevi e spiciarmenti dî turisti.
Assai spissu, l'arberghi furnìscinu midemma tanti sirvizza pi l'òspiti, comu nu ristoranti, na piscina, e sirvizza pî picciriddi. Arcuni arberghi prisèntanu macari na sala pî cunfirenzi, cû fini di ncuraggiari gruppi di cristiani a organizzari cunvegni e ncontri ntô propiu stàbbili.
L'arberghi si diffirènzianu dî motel 'n quantu la majuri parti dî motel prisèntanu trasuti sterni ê càmmiri, mentri l'arberghi tènninu a aviri trasuti nterni, p'aumintari la sicurizza dî crienti e criari n'ambienti chiù cunfurtèvuli.
Storia
canciaNtâ l'antichitati l'arberghi dî quali s'hannu nutizzi pricisi foru situati a Olimpia e Epidàuru, unni nta pirìudi diversi di l'annu, un nùmmiru cunziddirèvuli di cristiani si riunìa p'assìstiri a manifistazzioni spurtivi, cilibbrazzioni riliggiusi o a allistimenti cummirciali granni. Siddu li viaggiatura chiù pòviri s'avìanu accuntintari di tenni o barracchi, chiddi chiù facurtusi attruvàvanu rifuggiu nta strutturi custruiuti appositamenti e furmati di càmmiri siparati, cullucati ntunnu ôn curtigghiu cu culunnatu.
Ntâ l'antica Roma, longu li strati apparìanu li carteddi ca nnicàvanu li vari hospitia e deversoria, a li voti discrivuti comu lochi prumìscui e pitturischi.
Ntô Mediuevu, pi vuliri dî crisiàstici, surgeru xenodochi e ospizzi nun tantu diversi dî pinzioni-cunvittu muderni, c'avìanu lu scopu di pirmèttiri ê piddirini n'abbentu e un suggiornu tranquillu.
Doppu lu Milli s'accuminzau a diliniari la fiura prufissiunali di l'arbirgaturi mudernu e propiu nta ddu pirìudu l'osti e li lucanneri custitueru na sò curpurazzioni cu tantu di arrigulamentu.
Siddu lu pirìudu rinascimintali cuntribbuìu a nzignari lu gustu pâ tàvula bona e pî maneri curtisi e eliganti, ancora nzin'ô Setticentu si prifirìa l'uspitalitati privata, ma picca doppu nascìu la nnustria arbirghera pronta a accògghiri na crientela variata.
Nta l'èbbica muderna li novi ticnoluggìi cuntribbueru a fari evòrviri l'arberghi versu centri pinzati puru pû travagghiu, 'n particulari pi rializzari cunfirenzi e cunvegni sfruttannu ammientazzioni macari di granni mpattu quali chiddi ca s'attròvanu ntâ tanti art hotel