Amerigu Vespucci
Amerigu Vespucci (Firenzi, 9 di marzu 1454 – Siviglia, 22 di frivaru 1512) fu nu navigaturi italianu. Nti uni dî quattru viagghi ca fici ntê terri scuperti allura allura, si rinnìu cuntu ca li terri agghicavanu nzinu â latitudini 50 sud. Fu iddu ca capìu pi primu ca la terra scuperta di Cristofuru Culommu nun era l'estremu orienti (li Indi), comu cridìa Culommu, ma nu cuntinenti novu. Grazzi a chistu lu cuntinenti pigghiau lu nomu di America, in unuri di Vespucci.
![](http://upload.wikimedia.org/wikipedia/commons/thumb/5/5b/Amerigo_Vespucci.jpg/300px-Amerigo_Vespucci.jpg)
Tra l'àutri cosi, agghicannu nti nu paisi dâ costa di l'Oceanu Atlanticu visitau la cità ndiggina ca avìa cu casi n menzu all'acqua ca ci arricurdava la cità di Venezzia, comu lu dici iddu stissu nti na littra. Di sta discrizzioni veni lu nomu di Venezzuela.