Lu cavaddu senza testa

Sta liggenna veni dâ Catania dû 700 e è cullucata ntâ Via Crucìferi. Nta ssa Catania, li nòbbili ca tinèvunu ncontri amurusi ca s'avianu a tèniri ammucciati, fìciru circulari la vuci ca nta li notti pi li strati di la citati furiava nu cavaddu senza testa; cu ssa vuci, s'eppi lu risurtatu ca la pupulàzzioni, ô calari dâ sira, nun nisceva cchiù dâ casa.

Nu picciottu pirò fici na scummissa cu li sò cumpagni, e zoè ca iddu, senza nuddu scantu, avissi caminatu tranquillamenti di notti pi la citati: comu prova, avissi chiantatu nu grossu chiovu sutta l'arcu di lu cummentu dê monichi Binidittini, a Via Crucìferi.

Fatta la scummissa, stu picciottu, a menzanotti jivu ntô cummentu e, acchianatu nta na scala, ci chiantò nu grossu chiovu sutta l'arcu, senza accuggìrisi ca cô chiovu avìa attaccatu ô muru macari nu pizzu dâ sò mantella.

Quannu fici pi scìnniri la scala, vinni trattinutu dâ mantella e, pinzannu ca era "lu cavaddu senza testa" ca lu tineva, pô scantu, sciddicau dâ scala arristannu mpisu câ mantella ca, stringènnulu pô coddu, lu fici mòriri affucatu.

E accussì, mortu affucatu, vinni attruvatu ntê matinati: pê cumpagni (e pi quanti sèppiru di ssa storia), iddu avìa vinciutu la scummissa, ma lu "cavaddu senza testa" s'avìa minnicatu.