Rapi lu menu principali
Stampa du XVII seculu- Gallirìa Riggiunali da Sicilia Palermu

Pilligrinu ( ?, - Triòcala (AG) òi Caltabbillotta, 30 di jinnaru 253) è un Santu viniratu da Cresia Cattolica e Ortudossa.

AggiografiaCancia

Cocchi scritturi voli ca li Santi di stu nomi fussiru dui: unu vissutu nò primu seculu, e tempi di San Petru (40) e l’autru martiri sutta Valerianu e Gallienu ( nò 253 ). Ma quannu ci sunnu storii ca si ‘ntriccianu e si cunfùnninu, l’agiografi muderni vonnu ca u personaggiu fussi unu sulu ( comu li Santi Mamilianu e Calojru ). Dui sunnu i funti usati du Patri Cajetanu pi cuntàri a Vita di Pilligrinu: un manuscrittu di l’antica Triòcala ( oj Catabillotta ), ‘ntitulatu Martiriu dî Santi Libirtinu e Pilligrinu e un anticu Codici sarvàtu na Bibliuteca Aniciana, avutu di sò frati Custantinu, Abbati binidittinu. N’autra funti pa Vita du Santu è lu “ Ragguagliu da vita e da morti di l’Apostulu da Sicilia Santu Pilligrinu”, manuscrittu cartaciu dû 1794, copia di unu dû 1711, ricavatu di dudici manuscritti latini di Catabillotta, ca vennu di Atti Greci, sarvatu nà Bibliuteca Cumunali di Xacca. Secunnu sti funti Pilligrinu nascìu na Grecia na una Citati scanusciuta; qualcunu voli ca fussi Luca (oj Lycoa na l’Arcadia), ma lu Patri Cajetanu cunfunni lu Pilligrinu di Luca ( oj Lucca na Tuscana) cu chiddu di Triòcala.

Prima virsioniCancia

Lu fattu ca San Petru urdinò viscuvu Pilligrinu e lu mannò ‘n Sicilia cu na pocu di cumpagni è un typu aggiugraficu, comu na vita di San Calojru. Chiù certu è ca partùtu da Grecia, sbarcò a fuci du ciumi Virdura o a Eraclea Minoa (ca era ditta Cartagini nica) e cuminciò a pridicari lu Vangelu. Si nni ju a Triòcala, a sidici migghia di Eraclea, unni c’era un dragu ca ogni jornu si manciava un picciriddu ca vinìa tiratu a sorti cû bussulu. Trasùtu na Citati dumannò a na fimmina, pi amuri di Diu, un pezzu di pani. Chidda nun n’havìa e lu dumannò a na vicina. Chista u negò e lu pani dintra lu furnu addivintò na petra. Fu tiratu a sorti propriu u fighu da donna ca fu caritatevuli.Iddu u pigghiò pi un vrazzu e ‘nsemmula jeru nò dragu. Quannu chistu grapìu a vucca, Pilligrinu ci ‘nfilò u sò vastùni e u fici pricipitari dintra un burruni da caverna unni poi abbitò pi tutta a vita comu rimitu. [ U dragu significa u paganisimu, scunfittu da pridicazioni di Pilligrinu]. U picciriddu fu vattiatu cu nomi di Libbiratu e crisciùtu fu u succissuri di Pilligrinu na Sedi piscupali di Triòcala. U patri Cajetanu però, scrivi ca Pilligrinu nun fici vita di rimitu, ma avissi pridicatu u Vangelu a genti du postu; avissi distruttu i templi e l’iduli di pagani e fattu fari Cresii o veru Diu; divotu da Virgini Maria, fici pittàri a so fjùra supra l’artaru. Puru mmenzu o tumultu da ggenti, ca fici scempiu di sacirdoti pagani, Pilligrinu turnò a stari nà grutta pi trent’anni e murìu cunfurtatu du so populu e sippillutu nà stissa grutta.

Secunna virsioniCancia

A Girgenti c’era un Monasteriu, dittu di Trenta, guidatu di Agatuni, omu famusu na tutta a Sicilia pa sò scienza e a santa vita. Pilligrinu vosi tràsiri nà stu Munasteriu e fu di esempiu a tutti. Quannu ci fu a pirsicuzioni di Valerianu e Gallienu ( nò 253 ), u Consuli di Sicilia Quinzianu mannò a Girgenti un malu omu, di momi Silvanu, pi fari moriri a Libbirtinu.Un certu Pelaggiu dinunciò a Pilligrinu o judici. Silvanu ju puru o Munasteriu pi ‘ntirrugari a Pilligrinu ca nun vosi rinnigari a fidi e fu cunnannatu a mòriri abbruciatu. U focu però nun lu cunsumò. Donnina, fimmina piatusa, u sippillìu e supra o sapurcu fu fatta na Cresia. Un citatinu di Marsala, tali Libbiratu, ca era ‘ndimuniatu e cu fighu Abbundaziu paraliticu,partìu pi Roma pi addumannari a San Petru a grazia da saluti. U Santu Apostulu ci comparì e ci dissi ca si vulìa essiri sanatu havìa a gghiri o sapurcu di Pilligrinu. Na l’Encomiu di San Marcianu è scrittu ca “ Pilligrinu, chinu da duttrina di Marcianu, servu di Diu ( è u Santu Viscuvu di Saraùsa ), addivintò perfettu tistimoniu di Diu, fattu sacrificiu graditu nà tribulazioni e olocaustu di suavità supra u Munti dittu Cacumi di Crotàli, subbennu na morti simili a chidda di Libbirtinu, Viscuvu e Martiri da Cresia di Girgenti “. U Calinnariu marmoriu di Napuli riporta o 30 Jnnaru a data da morti di Pilligrinu.

Lu CultuCancia

San Pilligrinu è lu Patronu di Caltabillotta. Supra lu Munti è l’Eremu cu na Cresia barocca, ca custudisci dui grutti: du Santu e du dragu. C’è puru a ‘mprunta du pedi du Santu, i petri a furma di pani e affreschi du 1700. Du statui di lignu sunnu dintra l’Eremu: una nà sacristia, l’autra supra l’artari( ca veni purtata ‘n Prucissioni ). Na terza statua di lignu è nà Cresia Matrici di l’Assunta. Antuninu Mungituri scrivi ca u cultu du Santu era puru a Palermu, na Cresia di San Petru ‘n catini; c’era a Missa l’urtima Duminica di Jnnaru e si vidianu puru i petri a furma di pani e ca San Pilligrinu era u Patrunu di furnàri da Citati. Oj a Festa di San Pilligrinu è cilibbrata a Catabillotta lu 18 Austu.

I RiliquiiCancia

A tradizioni du Martiriu di Santi Pilligrinu e Libbirtinu porta a na Basilica nica nò Vadduni di San Brasi a Girgenti; nò pavimentu ci su dui sapurchi a sizioni trapezoidali du III seculu. E’ na Memoria di Martiri e a tistimunianza da traslazzioni di Corpi di du Santi di Triòcala a Girgenti. Si pò spiegari accussì a scumparsa du 3 Novemmiri ( data du Martiriu ) di l’ambienti di Triòcala e a cilibbrazzioni du 18 Austu, ca è chidda da Traslazzioni. N’autra memoria è però prisenti dintra u Tempiu da Cuncordia a Girgenti cu dui sapurchi allatu. L’Atti di Santi dicinu ca Libbirtinu fu sippillutu nò Foru di Giurgintani e Pilligrinu vicinu Girgenti.Quannu San Grigoriu di Girgenti cunsacrò comu Cresia di Santi Petru e Paulu u Tempiu dittu da Cuncordia, ci cullucò l’ossa di dui Santi, ca foru doppu purtati nà Catidrali ( Santa Maria di Greci ). Na Riliquia du Santu è nà Matrici di Catabillotta e veni purtata ‘n Prucissioni u 17 Austu.

BibbliografiaCancia

  • Ottaviu Caetani, Vite di Santi Siciliani Palermu pressu i Cirilli, 1657
  • Duminicu De Gregoriu A Cresia Girgentina Girgenti, 1996
  • Vittoriu Giustulisi U Viscuvu e u dragu Palermu, 1983
  • Vicenzu u Nicu Eremi e rimiti di Sicilia Ila-Palma Palermu, 1995

LiamiCancia

  • www.caltabellotta.com
  • www.caltabellotta.net