Sìculi

Li Siculi èranu nu pòpulu chi agghicàu in Sicilia dû cuntinenti probabbirmenti versu lu 1400 a.C.. La Sicilia era gghià abbitata dê Sicani e cchiù a uccidenti di l'Elimi, e perciò li Siculu àppiru a truvari n'accordu cu li Sicani. La fruntera tra li Sìculi e li Sicani fu lu ciumi Salsu. L'organizzazzioni dê Siculi era privalintimenti tribbali. Cu l'arrivu dî greci nta l'VIII sèculu e la prugrissiva culunizzazzioni, li Siculi àppiru a ritiràrisi versu l'internu, unni funnaru diversi cità. La lingua dê sìculi era sicuramenti indu-europea, ma nenti cchiù si sapi. Prima di l'arrivu dî greci nun usàvunu na scrittura, e ricintimenti forru truvati petri cu iscrizzioni sìculi chi ùsunu l'alfabbetu grecu. La prugrissiva ellenizzazzioni dî sìculi, purtau picca a picca â perdita di l'identità culturali. Ntô V sèculu a.C, li Sìculi, cu Ducèzziu agghicaru a urganizzarisi di manera unitaria, cuntrappunennusi ê greci, suprattuttu chiddi di Sarausa e di Catania. Lu statu unitariu Sìculu durau picca, e ntô 450 a.C. l'esercitu sìculu fu battutu dê sarausani, e Ducèzziu fu mannatu in esiliu a Corintu. Cu la prugrissiva culunizzazioni greca, li Sìculi pèrsiru accussì picca a picca l'influenza chi avèvunu avutu nzinu a su mumentu.