|
== Dialettu ==
A Caltaggiruni, intra li secula [[Seculu XIX|XIX]] e [[Seculu XX|XX]], in virtuti di l’[[Risurgimentu|unificazziuni nazziunali]] e dâ diffusiuni di menzi di communicazziuni di massa visiva e stampata, l’usu dâ [[lingua taliana]] si allargàu in quasi tutti li abbitanti e midemma in registra diversi di chiḍḍi furmali. La [[lingua siciliana]] pirò è macari presenti, nnâ sò varianti cittatina.
Ultra lu talianu, a Caltaggiruni si parra lu sicilianu, nnâ sò varietati lucali (chiamata ''caltaggirunisi'' o ''cattaggirunìsi'' nnâ grafìa lucali), chi fa parti dû dialettu sicilianu orientali, comu puru li dialetti di Catania e Saràusa, dê quali pirò si rendi distintu pâ presenza di nu storicu substratu dâ lingua liguri, ca lu rendi peculiari dê autri dialetti dû stissu tipu, e midemma dê dialetti gallu-italici di Sicilia, comu chiḍḍi di [[Ciazza (Enna)|Chiazza]] o [[Nicusìa (Enna)|Nicusìa]], ê quali veni comparatu a tortu. Comu in autri dialetti siciliani, esistunu influenzi [[Lingua francisa|francisi]], [[Lingua spagnola|castigghiani]], [[Lingua catalana|catalani]], [[Àrabbu|arabbi]], [[Lingua greca|greci]] e [[Lingua pruvenzali|pruvenzali]]. N'autra cosa ca va menziunata è macaru la sò natura di dialettu di transizziuni intra lu orientali e lu cintrali metafoneticu.
La so varietati lucali, lu caltaggirunisi, è nu [[Dialettu sicilianu orientali|dialettu orientali]] dû sicilianu, comu chiḍḍi di [[Saragusa]] e [[Catania]], pirò cu la nfluenza [[Lingua genuvisi|ligguri]] (probabilmenti [[Savuna|savunisi]]) e la prisenza di elementa dê [[Dialettu sicilianu cintrali|dialetta cintrali]], comu chiḍḍi di [[Castruggiuvanni]] e [[Nissa]]. Comu in autri dialetta dû sicilianu, sunu prisenti nfluenzi dê lingui [[Lingua castigghiana|castigghiana]], [[Lingua catalana|catalana]], [[Lingua occitana|pruvinzali]], berbera, tuscana e [[Lingua greca|greca]], ultra a prestiti dû talianu.
Nnû dialettu esistunu, a livellu di fonetica e fonoluggìa, elementi nun cumuni dû sicilianu standard, comu la vucali centrali chiusa ô postu dê vucali [i], la lenizziuni intervucalica a centru di palora (in modu particulari dû sonu /s/, ca si trasforma in /z/, macaru pirò dâ /ʧ/, ca si trasforma in /ʒ/), li vucali nasali (li quali currispundunu ê dittonga ''un-, in-, on-'', ''an-'' e ''en-'') e li semicunsunanta in posizziuni centrali (palori comu ''ovu, arburu e lampiuni'' sunu n'asempiu).
A livellu morfologgicu, va fatta menzioni dê pisanti usu dê tempi composti p'indicari azziuni dû passatu, li quali sunu preferiti ê tempi remoti, ca veninu utilizzati chiù pi autru a livellu esprissivu (''Jacupu ha rinzittatu a stanza''). È assai cumuni lu rotacismu (''durici'' ô postu di ''dudici'', ''renti'' ô postu di ''denti'', ''mannatu'' ô postu di ''mandatu'', ''bamminu'' ô postu di ''bambinu'', ''rossu'' ô postu di ''grossu''). Assai cumuni è la contrazziuni vucalica a principiu di palora undi la geminazziuni si manifesta (ccattari, llumari, ddunarisi, ddubbarisi, cchiapparisi, llipparisi, ffruntarisi, ddivintari, mmuccari, mmucciarisi) o la geminazziuni consunantica nnû parratu (''Mé (f)frati, comu (s)simu (c)cumminati (c)câ scola?''). Si pò vidiri macaru na particulari metafunesi, ca trasforma u sonu /a/ in /o/ nnâ prima sillaba (''olivi'' ô postu di ''alivi'', ''oricchi'' ô postu di ''aricchi'', ''sosizza'' ô postu di ''sasizza'', ''oceḍḍu'' ô postu di ''aceḍḍa'', ''cosetti'' ô postu di ''quasetti'', ''coriari'' ô postu di ''quariari'').
Oji, li tracci dâ lingua liguri sunu assai debbili, e chiù pi autru si pozzunu vidiri in alcuni particularitati in fattu di funetica. Qualcu lemma persisti macauru (carruggiu e scagnu li chiù lucali, mé figghiu, orbu, pumma, sociru sunu mmeci asempi di termini già presenti nnû restu dâ Sicilia). Alcuni cognoma chi hanu ḍḍa origgini o sunu assai diffusi ḍḍa, comu Grillu, Doria, Traversa, La Ferla, Marinu e Funtana, sunu presenti nnâ cittati.
Lu caltaggirunisi spissu ricogghi diversi elementi dê autri dialetti siciliani cu cui trasi in cuntattu: tanti voti, pigghia palori dû dialettu catanisi, in particulari li giovini e li abbitanti ca travagghiunu o studiuni nnû capulocu catanisi. L'influenza dû caltanissittisi si pò truvari in qualcu fenomenu di metafunesi ca in autri dialetti orientali sunu assenti (''nuatri simu'' ô postu di ''nuatri semu''), o in qualcu dittongu assenti nnê dialetti orientali (''guaddari'' ô postu di ''vaddari'', ''quinnici'' ô postu di ''chinnici''). Picca è l'influenza dû ràusanu, ca è presenti sulu nnê caltaggirunisi ca travagghiunu nnâ Sicilia sud-orientali.[[File:Caltagirone.jpg|thumb|La scalazza di Caltaggiruni, dicurata dâ famusa ciramica|alt=]]Lu dialettu caltaggirunisi nun avi na scrittura fissa: l'eggemonia dû talianu, la mancanza di nu veru standard di scrittura pû sicilianu e li particularitati in fattu di funetica e fonoluggìa creunu probblemi pi arrivari a na scrittura unica pi stu dialettu. Li soluzzioni preferiti sunu l'usu dê scritture ca vogghiunu éssiri lu standard dû sicilianu, o macaru usarili chisti cu qualcu variazziuni, comu p'asempiu l'omissiuni dê vucali finali (''cuḍḍureḍḍ''), l'usu dû grafema [e] ô postu di [i] (''Ture manciàu a pasta chê cacocciure''), l'usu di l'accentu pi indicari si la vucali è o nun è sonora (''a vìta ti duna pìcca e nenti''), li quali pozzunu éssiri n'anticchia chiù trasparenti nnâ littura.
Nnê frazziuni meridiunali de Graneri e Santu Petru, li comunitati parrunu lu dialettu sicilianu sud-orientali, lu ramu dê dialetti parrati a Ràusa e nnû bassu saràusanu, chistu pirchì li sò abbitanti veninu dê centri vicini a Ràusa, comu [[Còmmisu]], [[Vittoria]], [[Ciaramunti]] e lu stissu capulocu.
'''Dichiarazzioni Universali di li diritti di l'Omu'''
''"Ì cristjanicrìstijani nasciunu tutti lìbbiri e tutti ì stìssi, pi dignità e dirìtti. C' hanu u stìssu cirbeḍḍu e cuscienza, e s'hanu cumpurtari 'ntra ri ìḍḍi comu si fussuru frati râ stìssa matri."''
==== Patri nostru ====
''Accussi comu nuatri ì tugghìmu''
''ê debbituridebbitura nostri.''
''E nun ni lassari cascari 'n tentazzìuni,''
|
