Samizdat

Samizdat (самиздат) 'n russu voli diri "pubblicatu 'n propriu", e ripprisenta un fenòmenu spuntànio ca scuppiau nta l'Unioni Sovietica e ntê paìsi sutta la sò nfluenza (Cecoslovacchìa, Polonia, ecc.) a cavaddu di l'anni '50 e '60.

Praticamenti cunsisteva nta diffusioni ammucciuni di scritti illegali pirchì 'n qualchi manera cuntrari ô reggimi sovieticu. Nta stu pirìudu, ddu ca era nu prucessu sarvaggiu fici nu sàutu di qualità e addivintau na speci di stituzzioni alternativa. Fu lu principali "strumentu" (e ô spissu l'unicu) ca lu dissenso nascenti si desi pi putiri supravviviri e communicari, ô puntu ca qualchi vota veni idintificatu cu cchistu.

Lu samizdat sovieticu fu nu fenòmenu unicu ntô sò ggeniri. Arriprudùciri pi cuntu propriu (a manu o c'a machina pi scriviri, cchiù raramenti c'o ciclostili) dducumenti e libbra ca la censura ufficiali non avirrìa fattu circulìari mai nun era n'attività ca arriguardava sulu la littiratura: ô principiu si cci pubblicavunu dducumenti di ogni tipu, matiriali segreti, prutesti e appeddi, puemi, romanzi, saggìstichi filosòfichi. Ma versu la fini di l'anni '50 l'usanza d'arriprudùciri 'n propriu li testi e d'addiffunìrili addivintau nu travagghiu cuscienti e pricisu e s'allargau cu na vilocità ncredibbili.

Lu sistema era sìmprici: l'auturi scrivìa lu testu facennu nu pocu di copî c'a carta carvùni e doppu li spartìa all' amici; su chisti lu truvavanu nteressanti lu diffunnìanu macari iddi, arrivannu d'accussì ntê purtusi cchiù ammucciati dû paìsi.

Macari su nun vuscava cumpletamenti nenti di guadagnamentu e i rìsichi èranu assai, ô samizdat nun ci mancarunu mai auturi nteressanti e diffunnituri cu tantu spìritu di sacrificiu. Sennu ca 'mpiegava tècnichi sìmprici sìmprici era lu sulu menzu praticabbili nta l'Unioni Sovietica pi scansari lu putìri statali supra 'a circulazzione dê pinzèri e dê nformazzioni.

Li fascìculi dû samizdat passavanu vilocimenti di manu 'n manu, e ammattìa di putìr'aviri nu testu sulu pi na notti, pirchì la lista dê ggenti ca si prinotavanu p'avillu nun fineva mai. Allura lu furtunatu passava la nuttata vigghiannu, abbuddatu nta littura, e qualchi vota nvitava macari all'amici a participari.

Li pueti e li scritturi dû samizdat furunu ô spissu prucessati, ncarzarati, arrinchiusi ntê casi dê pazzi o ntê campi di cuncentramentu, castiàti, abbiàti fora dû paìsi, mmazzati, lassati senza travagghiu e posizioni sociali.

« "E nun aspittàvamu na vittoria, nun ci putìa èssiri la cchiù nnica spiranza di vittoria. Ma tutti vulìanu aviri lu diritto di dìricci ê figghi soi: "Ju fici tuttu chiddu ca potti." Vladimir Bukovskij, Il vento va e poi ritorna »