Russu

Chistu è nu quatratu culuratu di russu.

Lu russu è unu dî culura dû spettru ca l'omu arrinesci a vìdiri. Havi la friquenza cchiù àuta e la lunghizza d'unna cchiù longa e rispettu a l'àutri culura visìbbuli, tra 630 e 760 nanòmitri.

Friquenzi ancora cchiù vasci ricàdinu ntô nfrarussu.

È unu dî tri culura primari additivi, lu sò culuri cumprimintari è lu cianu. 'N passatu era cunziddiratu macari nu culuri primariu suttrattivu, mentri lu culuri utilizzatu ntâ stampa a culura muderna è lu maggenta.

Nu filtru russu è utilizzatu ntâ fotugrafìa 'n jancu e nìuru p'aumintari lu cuntrastu e fàciri cchiù drammàtichi arcuni sceni. P'asempiu, cumminatu c'un pularizzaturi, renni lu celu nìuru.

Usu, simmulismu e sprissioni virbali

• Russu è lu culuri ch'ìnnica lu caluri, p'asempiu ntê tubbazzioni o ntê mappi meteorològgichi.
• Lu russu attira l'attinzioni, pirchistu è mpigatu ntê signali di pirìculu o p'assignalari l'emirgenzi.
• Lu russu è lu culuri dû focu e contraddistinchi macari l'idranti, li stintura e li pumperi.
• Lu russu ìnnica l'alt ntâ circulazzioni, p'asempiu ntê simàfuri.
• La cruci russa o la menzaluna russa ìnnicanu, 'n accordiu chî Cumminzioni di Ginevra, pirsunali e menzi adibbuti ô succursu e niutrali.
• Ntô càuciu, nu cartiddinu russu ìnnica un faddu ca cumporta la spulsioni dû jucaturi dû campu di jocu.
• Ntê cursi automubbilìstichi, na bannera russa ìnnica lu stop mmidiatu ê màchini.
• Na lìnia russa ìnnica ntâ strumintazzioni lu lìmmiti màssimu rifirutu â misurazzioni rilivata dû strumentu stissu, p'asempiu la vilucitati màssima o lu nùmmaru di giri.
• 'N midicina lu russu è usatu pi nnicari l'arteri ca pòrtanu lu sangu, pumpatu dû cori, doppu aviri statu ussigginatu dî purmuna.
• Lu russu è lu culuri sia di l'amuri rumànticu, sia di chiddu dî senzi, è russu quinni sia nu cori di San Valintinu sia nu quarteri o nu cìnima "a lustri russi".
• Cû nizziu dâ Rivuluzzioni dû 1848, lu russu dî "sucialisti" vinni utilizzatu 'n Europa dî rivuluzziunari, spissu sutta di forma di bannera russa. Utilizzatu macari dî "cammisi russi" di Giseppi Garibbardi ntô Risurgimentu talianu, 'n sècutu utilizzatu dî gruppi dâ sinistra.
• L'idintificazzioni dû cumunismu cû russu "sucialista" havi appoi purtatu a l'usu dû russu pâ bannera di l'Unioni Suviètica e â stidda russa comu sìmmulu cumunista.
• Ntô simmulismu cinisi, lu russu è lu culuri dâ bona sorti e è utilizzatu pi dicurazzioni e addubbi nuzziali.
• Lu nchiostru russu ìnnica un dibbutu, comu puru la sprissioni "èssiri 'n russu".

Cuurdinati dû culuri russu

Esadicimali = #FFFF00
RGB    (r, g, b)    =  (255, 255, 0)
CMYK   (c, m, y, k) =  (0, 0, 255, 0)
HSV    (h, s, v)    =  (60, 100, 100)