Lu sciancateddu è nu jocu di granni abbilità, unni vinci cu è attrèticu, cu havi bonu lu senzu di l’urientamentu e di lu quilibbriu.

Disegnu pi jucari a lu sciancateddu

S’addisegna ‘n terra, ntâ strata o ntô curtigghiu, nu pircorsu cu tanti caseddi nummirati (comu è nnicatu nta lu disegnu ô ciancu) e nu jucaturi pi vorta, sartillannu supra nu sulu pedi, hâ pircorriri tuttu lu disegnu accussì comu ora si discrivi:

Lu primu jucatura, pigghia na pitruzza e la tira supra la casedda nùmmuru 1, cu nu pedi sulu sàuta supra la casedda nùmmuru 2, appoi, sempri cu lu stissu pedi di prima, sàuta ntâ casedda nùmmuru 3; ora, di lu nùmmuru 3 sàuta cu li gambi aperti pi arrivari a pusàrisi cu nu pedi a la casedda 4 e cu l’àutru pedi a la casedda 5  ; doppu, sempri cu lu stissu pedi di quannu ncuminzò lu jocu, sàuta nta la casedda 6; e ora, cu dui pedi tocca li caseddi 7 e 8.

A stu puntu, sautannu supra a iddu stissu, lu jucatura, fa na giravorta nta l’aria e si furìa nta l’àutru versu e torna arredi cu lu stissu prucidimentu di prima (zoè un pedi unni c’è disignata una sula casedda e dui pedi unni ci sunnu dui caseddi) e, mentri torna a la partenza, arricogghi la pitrudda c’avìa jittatu prima.

Si tuttu và bbeni, lu jucaturi ca cumpritau lu pircorsu avanti e arredi, addiventa patruni di la casedda unni ci jittau la pitruzza quannu ncuminzò lu sò turnu di jocu, e nuddu àutru pò tuccari cu li pedi dda casedda, ma chista, nveci, diventa pi lu sò patruni na casedda unni iddu si pò arripusari quannu ci passa pi ripètiri lu pircorsu.

Lu stissu jucatura, si cumpritò lu pircorsu, accuminza n’àutra vota lu jocu, ma tirannu la pitruzza nta la casedda nùmmuru 2 e avanti accussì jittannu, ogni vota ca ricuminza, la pitruzza nta lu nùmmuru chiù àutu.

Si lu jucatura sbagghia (tocca na lìnia mentri sartella, nesci cu li pedi fora di na casedda, tocca na casedda cu dui pedi nveci di unu), lassa lu postu a n’àutru jucaturi ca ncuminza di la prima casedda senza patruni.

A manu a manu ca si joca, spiciarmenti si li jucatura sù assai, ci sunnu tanti caseddi di pruprietà di li vari jucaturi e addiventa sempri chiù diffìcili putiri fari lu pircorsu. Nunca, si lu primu jucatura, mintemu, fici tri turni di jocu e divintò patruni di li caseddi 1, 2 e 3, lu jucatura ca veni doppu, hâ ncuminzari lu jocu facennu nu sautuni finu a la casedda nùmmuru 4 !

Cu è ca pi primu arrinesci a èssiri patruni di tri caselli, prova a vìnciri lu jocu:

La prova è difficilìssima, picchì chistu hâ fari lu pircorsu cu l’occhi ntuppati.