Straggi di Bronti
La Straggi di Bronti fu nu eccidiu di civili, fattu a Bronti (CT) di li truppi garibbaldini cumannati di Ninu Bixiu, ntî l'austu di lu 1860.
Li «fatti di Bronti»
cancia
Doppu lu svarcu di li cammisi russi e la succissiva libbirazzioni, ntî l'hinterland sicilianu s'avìanu addumatu assai spiranzi di riscattu suciali pi parti, cchiossai, di la media burghisìa e di li classi cchiù pòviri. A Bronti, a li pedi di lu Mungibbeddu, lu cuntrastue era assai ntra li sustinitura di la britannica Ducìa di Nelson, annincati "ducali", e li "cumunisti" di pinzeru sucialista e libbirali, cumannati di l'avvucatu Nicolò Lombardo.
Lu 2 di austu a lu malustari pupulari si agghiuncèru diversi àutri genti ca vinìanu di li paisi a lu cantu e scuppiau la rivota pupulari.
Fu accusì ca vìnniru anciammati dicini di casi, lu tiatru e l’archiviu cumunali. Accuminciau na caccia a l'omu e cci foru sìdici morti ntra nòbbili, ufficiali e civili, prima ca la rivota s'astutassi.
Pi purtari arreri l'òrdini juncìu nu battagghiuni di garibbaldini sutta lu cumannu di Ninu Bixiu. Li critici pigghiaru stu fattu comu la virifica di parti di Garibbaldi d'addifènniri li ntiressi di li Anglisi, ca avìanu ajutatu li cammisi russi. Quannu Bixiu accuminciau la sò ndàggini supra li fatti succiuduti grossa parti di li rispunsabbili avìanu jutu ad àutri banni, mentri certiduni ufficiali cugghieru l'uccasioni pi accusari l'avvirsari pulìtici. L'avvucatu Nicolò Lombardo vinni ingiustamenti annincatu comu cumannati di rivota senza ca cc'èranu provi contru a iddu.
Lu tribbunali mistu di verra ntî nu prucessu ca durau cchiù picca di quattru uri judicau 150 pirsuni e cunnannau a la morti Nicolò Lombardo, anzèmmula ad àutri quattru pirsuni: Nunzio Ciraldo Fraiunco, Nunzio Longi Longhitano, Nunzio Nunno Spitaleri, Nunzio Samperi. La sintenza vinni sicuta tràmiti la fucilazzioni lu 10 di austu, a l'agghiurnari.
| « Li assassina, e li latri di Bronti hannu statu siviramenti puniti - Vui lu sapiti! la fucilazzioni assicutau subbitania li sò dilitti - Ju lassu sta Pruvincia - li Municipia, e li Cunzigghi civici arreri numinati, li vardia nazziunali di novu urganizzati m'hannu arrispùnniri 'n futuru di la pùbbrica tranquillità!... Pirò li Capi hannu a stari a lu sò postu, hannu aviri enirgìa e curaggiu, hannu aviri fiducia ntî lu Cuvernu e ntî la forza, ca iddu havi - Cui nun senti di stai bonu a lu sò postu si dimittissi, nun ammàncanu citadini capaci e chini di forzi ca ponnu pigghiari lu sò postu.
Li auturità hannu a diri a li sò amministrati ca lu cuvernu si pròccupa di li liggi e di uppurtuni ligali judizzia pi lu riintigru di li dimanî - Ma hannu a diri macari a cui ancigna àutri strati e cridi di fàrisi justizzia sulu, vai a li istigaturi e suvvirtituri di l'òrdini pùbbricu sutta qualisiasi scaciuni. Si nun sugnu ju, àutri a lu postu miu vèninu a fari arreri li fucilazzioni di Bronti si la liggi lu voli. Lu cumannanti militari di la Pruvincia passa pi li Cumuna di stu distrettu. Rannazzu, 12 di Austu 1860. » |