Villa Cerami

La Villa Cerami di Catania era la risidenza di la famigghia Rosso di Cerami. Oi è la sedi di la Facultati di Liggi di l'Univirsitati di Catania. Surgi a lu finiri di la Via dei Crociferi.

Villa Cerami, sedi di la Facultati di Liggi di l'Univirsitati di Catania

Degnu di notu lu purtali di ngressu, adurnatu ccu lu stemma di la famigghia Rosso di Cerami, ca duna ntî lu granni curtigghiu di la villa, unni s'affaccia lu scaluni munumintali, arriccutu ccu na funtana. La villa è furmata di corpi sitticinteschi, finuti di sistimari di lu XIX sèculu.

Attiva è la vita ca si fa dintra di idda. Migghiara di juristi cci vannu e cci studìanu. Praticati sunnu li àuli ppi li lizzioni, comu macari li bibbliutechi e li àuli studiu di li piani suprajuri, unni li studenti, ntra na lizzioni e n'àutra, attròvanu tempi ppi studiari. Addupirati sunnu macari lu jardineddu e la chiazzudda comu punti di ncontru e di studiu.