Cridenzi pupulari

Comu nta tutti li riggioni dô munnu, macari ntâ Sicilia li tradizzioni e li cridenzi pupulari già di l'antichitati hannu svulgiutu nu rolu assai mpurtanti ntâ vita e ntê custumi.
Li cridenzi pupulari, vènunu spissu di ntrippitazioni di fatti naturali, liggenni, miti e superstizzioni.

Virtù di arcuni scogghi

Certi scogghi pussèdunu la virtù di dari boni o mali nutizî. A Tràpani sunnu famusi chiddi di "fora porta Eusebbia", unni c'è a chiesa di San Libbiranti, a riva dû mari.
San Libbiranti è nu Santu pupularissimu e la sò festa veni lu lunidìa di Pentecoste, unni, nta ssu jornu, pô populinu è n'uccassioni pi fari, comu si dici, na scialata.
Appena agghjorna, a chiesa è china-china di cristiani ca, fatti li prijeri, stendunu 'n terra fazzuletti e tuvagghioli, e accumencianu a manciari. Finutu di manciari, li fìmmini si lèvunu li scarpi e, scàusi, cùrrunu ntô mari vicinu pi lavàrisi li pedi, cugghennu nta la spiaggia cunchigghi o àutru.
L'acqui dô mari, hannu straurdinari puteri, e lu stissu li scogghi. A cu voli nutizzî di parenti ca sunnu ppi mari luntani, si nni va, versu menzanotti, vicinu a li scogghi di "fora porta Eusebbia" e, pi tri voti, chiama forti lu nomu di la pirsona ca cci ntaressa. Si li scogghi arrispùnnunu (è lu scrusciu dû mari ca fa contru li scogghi), si sapi unn'è lu parenti; si anveci no, allura sicuramenti successi quarchi disgrazzia.
Quarcunu, prima di chiamari lu nomu dô parenti, jetta na petra nta l'acqua ( assicurànnusi accussi di l'arrispunnuta dê scogghi).

Travagghi intra l'annu

Ancora oggi risisti la cridenza, speci ntê paisi di l'intraterra, ca prima dô vèniri dâ menzanotti di l'annu novu, s'hà finiri a ogni costu nu travagghiu accuminciatu; si chissu nun putissi èssiri fattu, ssu travagghiu pò arristari mpintu pi tuttu l'annu novu.
Pi evitari ca putissi succèdiri sta cosa, s'hann'a ricitari, chê manu isati versu l'àutu, cincu credu, cincu salveriggina, cincu paternostri, cincu avemaria, cincu gloriapatri e na prijera finali, unni l'urtima palora hà èssiri ditta prima di l'ùrtimu rintoccu di campana ca signala la menzanotti.

La prijera è chista:

Lu Patri, lu Figghiu, lu Spiritu Santu,

Eterna Trinità di lu cumannu,

Chistu travagghiu l'haiu stintatu tantu!

Ora na sula grazia addumannu:

Vui lu tuccati e lu faciti santu,

Binidittu m'arresta tuttu l'annu;

E binidittu e binidittu sia!

Biniditta la Vìrgini Maria!

Casa nova

Pê catanisi quannu si va a stari nta na nova casa, s'hann'a pigghiari arcuni pricauzzioni: s'hà tràsiri pâ prima vota ntâ casa nova cô pedi sinistru e s'hà purtari, apprima di quarsiasi àutra cosa, na vastedda di pani (auguriu d'abbunnanza), na buttigghia di ogghiu e n'àutra di vinu (macari chissi pi auguriu d'abbunnanza), na picca di sali (contru tutti li magarii e la mmìria di li vicini), na scupa comu segnu di pulizzia, e, appena si trasi, si dìciunu arcuni palori: "Pòvira trasu e ricca mi nn'haiu a ghiri", pi auguràrisi accussì n'avviniri cchiù megghiu di chiddu prisenti.

Li ciuri di Maju

A Ribbera, ntâ jurnata dû Primu Maju, si usa spànniri avanti â porta dâ casa, marghiritini giarni o janchi (li ciuri di maju), comu augùriu di furtuna, di pruspiritati e di raccolti boni: ogni ciuri voli èssiri na salma di frummentu.

Li sònnira

Li sònnira ntâ tradizzioni pupulari su' cunziddirati assai assai, pirchì ponnu èssiri ntrippitati comu nu signali di bonu o di malu augùriu.

Chisti li sònnira di bonu augùriu:

Nzunnàrisi un cristianu mortu, porta bonu;
Di èssiri morti: chistu è un signali di vita longa;
Di vidiri mòriri: ci allonga la vita;
Lu cravuni: voli diri saluti bona;
Li pidocchi: pòrtanu furtuna e sordi;
Li pisci: pòrtanu nutizzî boni;
A' merda : porta sordi.

Chisti li sònnira di malu augùriu:

Oru, argentu e sordi: tradimentu, ngiùrii, ngannu;
L'acqua pulita e trasparenti: voli diri làcrimi e suffirenzi;
Aricèviri rijali: pòrtanu miseria;
Cosi duci: l'amarizzi dâ vita;

Casa fatturata o nnucchiata

Quannu si penza ca la casa appi fatta na fattura (o vinni nnucchiata), s'ha' jittari acqua e sali 'n terra e ntê mura di tutta la casa, pri mannari fora li dimònii e li mali spirdi; li fìmmini s'hann'a cummigghiari li minna, sciugghìrisi li capiddi e, addinucchiuni, dànnusi corpa pri tri voti ntê dinocchi, pri tri voti hann'a diri sti palori:

Acqua e sali mè Signura,

pri livari la fattura,

acqua e sali San Giuvanni,

p'astutari stu focu granni,

acqua e sali pri li magari,

và fattura e nun turnari!