Rapi lu menu principali

Ethnologue: Languages of the World (zoè "Etnòlucu: Lingui dû Munnu" n sicilianu) è na pubbricazzioni cartàcia e alittrònica dû SIL International (pricidentimenti canusciutu comu Summer Institute of Linguistics, zoè Stitutu estivu di linguìstica), n'urganizzazzioni cristiana, ca studia principarmenti li lingui menu canusciuti, suprattuttu pi fari arrivari lu missaggiuBibbia a lu nùmmiru maiuri pussìbbili di littura ntâ sò lingua matri (comu lu sicilianu ch'è la lingua matri di li siciliani).

Ethnologue cunteni statìstichi di 6.912 lingui ntâ chinnicèsima edizzioni, rializzata ntô 2005 (crisciuti dunca rispettu ê 6.809 dâ quatturdicèsima edizzioni, rializzata ntô 2000) e d'ognuna furnisci lu nùmmiru dî parranti, li riggiuni di diffusioni, li dialetti, l'affiliazzioni linguìstichi, la ripiribbilitati dâ Bibbia.
Attuarmenti è lu nvintariu di lingui cchiù esaurienti nzèmmula a Linguasphere Register.
Comu è gghiè arcuni nfurmazzioni riguardu li lingui cchiù esutèrichi sunnu cchiuttostu datati.

Ntô 1984 Ethnologue rializzau nu sistema di cudificazzioni a tri littri, chiamatu còdici SIL, p'ogni lingua ca discrivi. Tali nzemi di còdici sùpira li pricidenti standard ISO 639-1 e RFC 3066. Ntâ quatturdicèsima edizzioni, pubbricata ntô 2000, èranu nclusi 7148 còdici nun currispunnenti ô standard ISO 639-2. Ntô 2002 nfini SIL cullabburau cu l'Urganizzazzioni Ntirnazziunali pi li Standardizzazzioni (ISO) pi ntigrari sti còdici ntô standard ntirnazziunali: Ethnologue ora utilizza stu standard, chiamatu ISO 639-3. Li diffirenzi ntra li dui virsioni si ponnu vìdiri nta http://www.ethnologue.com/codes. L'edizzioni nùmmiru 15 pubbricata ntô 2005 ncludi 7299 còdici.

Ortri a dicìdiri nu nomu principali pi na lingua, Ethnologue nn'arriporta videmma àutri noma chî quali chista è chiamata dî sò lucutura, dû cuvernu, dî furisteri, ortri ca li noma cu li quali fu difinuta ntô passatu e ntâ littiratura, nnipinnentimenti di quali dinuminazzioni è ritinuta ufficiali, puliticamenti curretta o uffinziva. Tali silezzioni di "noma altirnativi" è vasta, ma spissu puru ncumpreta.

Ethnologue cunteni la sò parti di sbagghi. Arcuni di st'erruri sunnu fissati nta ogni edizzioni nova; p'asempiu, rispettu â quatturdicèsima edizzioni, arcuni lingui foru agghiunciuti, mentri àutri "lingui" la cui difinizzioni era assai dibbattuta foru livati. Nta àutri casi, puru siddu foru discurruti, certiduni erruri pussìbbili ristaru forsi.

LinguìsticaCancia

Zoccu veni cunzidiratu na lingua addipenni di valutazzioni sociu-linguìstichi. Arcuni autura accùsanu Ethnologue di nun vìdiri arcuni lingui, n quantu prifirìscinu chiamari sti varitati differenti "parrati". Nta àutri casi Ethnologue fu accusata d'ammunziddari lingui diversi comu "parrati" dâ stissa lingua. Comu arriporta la prifazzioni: « Nun tutti li studiusi ùsanu lu stissu nzemi di criteria pi difiniri zoccu custituisci na "lingua" e zocch'è na "parrata" ».

La "niutralità" di Ethnologue comu stituzzioni linguìstica è a li voti discurruta, particularmenti nta l'ària dâ classificazzioni dî lingui e n rilazzioni â Bibbia e li tri riliggiuni monuteisti. Nu casu asimprari pò èssiri la classificazzioni di l'àrabbu nzèmmula a l'ebbràicu comu parti dî lingui simìtichi cintrali dû sud, distinchènnuli di l'aramàicu, quannu mmeci lu cunzenzu accadèmicu tenni a vìdiri comu cchiù vicini l'ebbràicu e l'aramàicu.

StatìstichiCancia

Comu già dittu, Ethnologue furnisci p'ogni lingua li statìstichi riguardu la diffusioni.
Nta certiduni casi parò, li stimi di Ethnologue riguardu lu nùmmiru di lucutura dî lingui nun cuncòrdanu cu àutri fonti. Nta certiduni casi lu nùmmiru dî lucutura di na lingua nta nu paisi arripurtatu di Ethnologue è supiriuri ô tutali dâ pupulazzioni di stu paisi. P'asempiu n Cruazzia la pupulazzioni arripurtata è di 4.496.869 abbitanti, ma lu nùmmiru di parranti cruatu n Cruazzia arripurtatu è 4.800.000.

Nfurmazzioni vecchi e noviCancia

Ethnologue, simirmenti a Wikipedia, arricevi li sò nfurmazzioni di pirsuni n tuttu lu munnu. Cu è gghiè pò mittìrisi n cuntattu chî ridattura cu li propi suggirimenti (Info-sil@sil.org). Ma, ô cuntrariu di Wikipedia, li nfurmazzioni vennu aggiurnati sulu una vota ogni quattru anni.

Puru siddu Ethnologue veni piriodicamenti aggiurnata, tanti dî nfurmazzioni sunnu "vecchi". Chistu pirchì li ridattura nun riasàminanu ogni vuci p'ogni edizzioni nova.

Artìculi currilatiCancia

Lijami di foraCancia