Eufemiu
Eufemiu (mortu a Castrugiuvanni ntô 828 o 829) fu nu ginirali bizzantinu. Agghiri lu 826 doppu aviri ammazzatu Fotinu, cuvirnaturi di Sicilia occupò Sarausa e cuntrullava tutta l'ìsula quannu si prucramò mpiraturi. Ntô 826 stissu o macari a l'accuminzagghia dû 827 li truppi bizzantini lu batteru, e iddu àppi a arrifuggiàrisi n Tunisia, unni addumannau l'ajutu di l'àrabbi pi ricunquistari la Sicilia. Sbarcò n Mazzara cu na flotta sutta lu cumannu di Asad ibn al-Furat, pi cunquistari l'ìsula pi l'àrabbi, n canciu dû tìtulu di mpiraturi dâ Sicilia pi iddu. Doppu l'assidiu di Sarausa, e la cunquista di Mineu, fu ammazzatu n Castrugiuvanni duranti l'assidiu dâ citati dû 828-829. E' cunzidiratu comu chiddu ca causò la nvasiuni àrabba dâ Sicilia e lu duminiu àrabbu dâ Sicilia pi chiossai di dù sèculi.