Francu Battiatu
| « Cerco un centro di gravità permanente che non mi faccia mai cambiare idea sulle cose, sulla gente » | |
(Centro di gravità permanente, La voce del Padrone 1981)
|
Francu Battiatu (o Franco Battiato n talianu) nascìu a Jonia (ca ora si chiama Ripostu) ca s'attrova ntâ pruvincia di Catania, lu 23 di marzu dû 1945 e murìu lu 18 di maiu dû 2021, fu nu cantanti, nu musicista e macari nu pitturi (quannu tinci tili si frimma Suphan Barzani). Ntâ l'ùrtimi anni si misi a fari lu riggista.
Iddu è unu dî cchiù eclèttici artisti ca cci sù nta lu munnu: nta l'anni hà canciatu tutta la sò mùsica e ogni vota nta na manera diversa.
Musicau òpiri e balletti ca hannu fattu lu giru d'Italia; misi na mùsica macari ntâ missa chî paroli di na vota 'n latinu, ca fici lu giru di na picca di cresi; scrissi puru na para di canzuni 'n sicilianu: Stranizza d'amuri, ca s'attrova nta l'àrbum "L'era del cinghiale bianco", Veni l'autunnu (nta l'àrbum "Fisiognomica"), e 'U Cuntu, nta l'àrbum Inneres Auge, mentri ca Il cammino interminabile (nta l'àrbum "Ferro battuto") lu tìtulu e li primi strofi sunu 'n talianu e lu restu 'n sicilianu.
Ntâ canzuna Strade Parallele (Aria Siciliana), scritta di Giuni Russu e ca s'attrova nta l'àrbum "Se fossi più simpatica sarei meno antipatica", truvamu Battiatu ca canta cu idda 'n sicilianu.
È cchiù famusu e canusciutu pâ mùsica liggera, ca apprima era spirimintali e appoi addivintò pop, doppu canciò pû rock, pi finiri cu sunuritati ca pàrrunu nu pocu tecnu. Cu tutti ssi canciamenti, arriniscìu a tiniri sempri na furma tutta sò ca nuddu arriniscìu a imitari.
Cu la sò mùsica, foru tanti chiddi ca ci cantaru di supra e ci fu macari n'amiricanu ca pigghiò li sò noti e fici na mùsica tutta sò.
Francu Battiatu cullabburau cu Giustu Piu, Manliu Sgalambru, Giuni Russu, Alici e àutri.
L'ùrtimu arbum, ca niscìu nta lu misi di nuvemmiru dû 2009, si chiama "Inneres Auge".
La pittura
canciaComu pitturi li sò teli si fannu nutari pirchì di sòlitu usa nu sfunnu tuttu duratu, cu suggetti ca spissu pàrunu urientali, casi e iconi bizzantini. Usau nu ritrattu pû librettu di n'òpira sò, Gilgamesh. Vidiri li sò quatri nun è fàcili: quannu nun li rigala a l'amici, si l'appenni ntâ sò casa ca è china di ssi quatri, oppuru li vinni ppi quarchi 2.000 èuru.
Accuminciò a fari lu riggista pî sò videoclip ntô 1979, appoi pirò ntô 2003 girò nu firm, Perduto Amor, canciannu tutti li règuli dû cìnima, e pi chistu si pò diri ca è n'òpira d'arti dû cìnima, pirò nun s'avissi a chiamari firm. Ntô 2006 niscìu Musikanten, nu firm supra lu mùsicu frammassoni Ludwig van Beethoven ca parra macari di ipnosi. "Niente è come sembra" (Nenti è comu pari, 2007) è la terza pruduzzioni fìrmica di Battiatu. Si tratta di nu firm filusòficu, ntô quali si discurri di l'esistenza di Diu e di la natura umana. L'iniziu havi lu stissu tema dâ Divina Commedia di Danti Aligheri, unni lu prutagunista (Giulio) si perdi nta nu voscu scanusciutu. Ntô 2010 Battiatu fa nèsciri nu curtumitraggiu biugràficu didicatu a lu granni scritturi Gisuardu Bufalinu ntitulatu Auguri Don Gesualdo. Ntô firm/ducumentariu, ntra l'àutri, cumpàrunu lu filòsufu Manliu Sgalambru (amicu e cullaburaturi di Battiatu di lu 1994), l'artista Pieru Guccioni, Matteo Collura e rari vidiu di ripirtoriu ccu Liunardu Sciascia, lu scritturi di cui Bufalinu avìa veru granni rispettu.
La sò vita
canciaNta l’ùrtimi dicenni, stu cristianu s’avvicinau a la disciprina di li “sufi” e nta tutti li sò òpiri, chini di spiritualitati, si nni senti la nfruenza. Mportanti la scuperta, versu la fini di l'anni '70, di Gurdjieff, filòsufu armenu cripticu e veru urigginali. Lu tìtulu di l'assai famusa canzuni Centro di gravità permanente è pigghiatu di na tiurìa propiu di Gurdjieff. A chistu filòsufu è ispiratu lu discu di lu 1978 L'Egitto prima delle sabbie cca vincìu lu premiu ntirnazziunali Stockhausen pi pianuforti.
Lijami nterni
cancia
