Palora (unitati)

La palora (dû grecu παραβολή parabolè, attraversu lu latinu parabŏla, poi nnâ lingua vulgari veni suggettu a mitatesi) è n'unitati distinguìbbuli ntê frasi ca usamu ntô parrari e scrìviri. Nnâ linguìstica rapprisenta la cchiù nica cumpunenti chi pò èssiri ditta cu nu significatu ovviu, di sòlitu rapprisenta nu tèrmini o vucàbbulu.

La palora pò èssiri parrata o scritta. Chiddi parrati cumprènninu soni chi si chiàmanu funemi. Chî palori scritti, li sìmmuli gràfici (la grafìa) si chiàmanu grafemi. Ogni sìmmulu sìngulu e' littra chi fannu parti di l'alfabbetu dâ lingua pirtinenti.

Modi di diri

• cci l'haiu supra â punta dâ lingua, ssa palora! - aviri na palora mpizzu â lingua chi nun cci veni a unu
• mâ luvasti di mmucca ssa palora! - discurrennu ntr'amici, quannu unu dici quarchiccosa chi n'àutru stava pi diri
• nun cci haiu caputu na palora! - quannu unu nun capisci nenti di zoccu vinni discurrutu
• diri certi palori muzzi - parrari tra li denti
• sturpiàri li palori - prununziari senza chiaritati
• palora ammàtula - bistèmia o jastima
• a palora a palora; di palora 'n palora - â littra

Ntâ littiratura siciliana

Palori di Marcu Scalabrinu, n'astrattu:

Certi palori sunnu duri

duri chiù di autri

a ncrucchittari

ntantu mi sconcicanu

mi cunnucinu manu manuzza

m'ammustranu mari e munti

e universi trascinnenti

e poi addimuranu

s'annacanu tutti e scialanu

si siddìanu e l'aju a priari.

Pruverbi

• Li megghiu palori sunnu chiddi ca nun si dìcinu. (Spissu e' megghiu nun dìrinni la prima cosa ca si cci veni mmucca, spiciarmenti si fùssiru palori banali o nùtili.)

Rifirimenti

Sta vuci è na difinizzioni sìmprici di na palora n sicilianu. Lu sò cuntinutu pò èssiri migghiuratu.

Lingua Siciliana
Cosi di tutti jorna - Azzioni umani - Prufissioni - Sprissioni Tipici - Lingua Siciliana