La Sicilia è lijata a na nfinità di miti e liggennni ca nta li sèculi hannu nfruinzatu la curtura e li tradizzioni. Assai di chissi vènunu di cunti urali, fàuli, ntrippitazioni fàusi e mminzioni.
Aci e Galatea
Aci, era un pastureddu ca viveva, pasculannu li sò pecuri, ntê pinnici di l’Etna.
Di iddu era nnammurata na biddìssima carusidda, ca si chiamava Galatea e ca avìa rispintu la pruposta d’amuri di Polifemu.
Chistu, quannu s’accurgìu ca Galatea sa facìa cu lu pastureddu Aci, lu ammazzò, p’aviri, accussì, la strata lìbbira cu la bedda carusedda Galatea.
Ma, l’amuri di Galatea pi lu sò Aci, cuntinuò macari nfinu a doppu ca chistu era mortu, e Polifemu ristò comu nu passuluni. La janca Nereide, scunzulata, cu l’ajutu di li Dei, traspurmò lu corpu mortu di Aci nta surgivi di acqua duci, ca ancora oggi scìnninu pi li pinnici di l’Etna, vucalijannu sona malincònici di struggenti nustalgìa.
Polifemu era nu Ciclopi cû n’occhiu sulu ammenzu a la frunti; figghiu di la ninfa Toosa e di Puseidoni (chiamatu Nittunu dê latini) e frati di Zeus (Giovi) re di l’Olimpu.
Li Ciclopi sunnu figuri favulusi di la mituluggia greca, àuti gigantiscamenti e cû n’occhiu sulu ammenza la frunti (dô grecu kuklops = di l'occhiu tunnu).
Nta èbica antica li mitùgrafi cuntàvunu tri stirpi di ciclopi: i figghi di Uranu e Gaia (lu Celu e la Terra), ca appartinèvunu a la prima ginirazzioni divina di Giganti; i Ciclopi "custruttori", ca custrueru tutti li munumenta pristòrichi ca si vidèvanu ‘n Grecia, ‘n Sicilia e artrovi, costruiti cu grannìssimi blocchi (li "mura ciclòpichi"); e li Ciclopi "siciliani", cumpagni di Polifemo, cuntatu di Omeru
Na liggenna assai cuntata nta tutti li cuntrati dô Stritto dici ca nta l’èbbica di li nvasioni barbàrichi ntô misi d’austu, mentri celu e mari eranu senza nu ciusciu di ventu, e na negghia nica-nica faceva comu a nu velu a l'urizzonti, li bàrbari doppu ca attravissaru tutta la pinìsula taliana, agghicaru ntê costi dâ cità di Riggiu e s’attrovaru davanti a lu stritto ca sparti la Calàbbria da Sicilia. ‘N facci, nta l’àutra spunna dô mari, vìttiru n'isula - la Sicilia - cu nu granni munti fumanti - l'Etna - e lu Re bàrbaru s’addumannò comu putìa fari pi agghiuncìrila truvànnusi senza mancu na varca. Mpruvvisamenti apparìu na fimmina bedda assai, ca ci uffrìu l'ìsula a lu cunquistaturi e cu nu cennu dâ manu ci la fici appariri vicinissima, a purtata di manu . Taliannu nta l'acqua iddu vidìa chiari li munti, li spiaggi, li strati di campagna e li navi ntô portu comu si putissi tuccàrili chê manu. Picciò lu Re bàrbaru sautò ‘n terra dô cavaddu e si jittò nta l'acqua, sicuru di putiri agghicari a l'ìsula cu nu paru di brazzati, ma li ncantèsimu si ruppi e lu Re annijò. Tuttu chiddu ca avìa vistu era, nfatti, nu miraggiu, nu jocu di luci di la bedda e scanusciuta fìmmina, ca era la Fata Morgana.
