Stemma cità di Catania
|
Sta pàggina è òrfana, zzuè nun àvi lijami a tràsiri.
Pi favuri, agghiunci na lijami a sta pàggina e scancella st'abbisu. |
Lu stemma dû Comuni di Catania é custituitu di nu scudu cô funnu azzurru, cimatu di la curona riali aragunisi e sutta a la liggenta c'è scrivutu "S.P.Q.C." (*); a lu centru c'è nu liafanti (**) di culuri russu purpurinu misu di prufilu, cu la prubbòsciti isata e li zanni di culuri avòriu girati a manu manca e supra d'iddu c'è misa na granni littra maiùscula "A" (***), macari chista di culuri russu.
(*) Catania rumana si friggiava di la sigla latina mpiriali "S.P.Q.C." Senatus Populus Que Catanensium: Lu Sinatu e lu Pòpulu di Catania.
(**) Lu sìmmulu ufficiali dâ cità di Catania è la stàtula di petra làvica dô liafanti, chiamatu dê catanisi Liotru (o Diotru) e ca s'attrova ntâ chiazza ô Domu dô 1736.
(***) La littra “A” ca è misa ntô stemma cìvicu, è la littra nizziali dû nomu di Agathae (Sant'Àgata, patrona dâ cità) e voli arricurdari nu miràculu fattu dâ Santa ntô 1357.
A maju di dd’annu , ci fu ntô Golfu di Ògnina nà tinta battagghia ca, vistu comu finìu, passò ntâ stòria comu "Scaccu di Catania". La frotta siciliana cumannata di l'ammiràgghiu Artali Alagona, ô gridu "Sant’Àjta e Alagona" vincìu l’ avvirsari, canciannu a sò favuri li sorti di la “Guerra dê Novant'anni", ca dû 1282 ô 1372 si cummattìu tra Napuli e la Sicilia.