Wikipedia

Tiatru romanu di Catania

Lu Tiatru romanu di Catania s'attrova ntô centru storicu dâ citati, ntra la chiazza San Franciscu, 'a via Vittoriu Emanueli II, via Timeu e via Tiatru grecu. La so' forma cha si po' vidiri è dô II sèculu e si po' vidiri di la fini dô XIX sèculu. A livanti s'attrova puru 'ntiatru romanu cchiù nicu, cha è dittu odeon.

L'orchestra dô Tiatru, soventi jncuta di' 'na surgenti dô Muntivirgini.

Storia

cancia
 
Parti dô Tiatru grecu, cha si vidi dô curtigghieddu dâ Casa dell'Androne.
 
'A Casa del Terremoto, casuzza nica dô XVI-XVII sèculu cavata di le mura dô Tiatru e scummigghiata ndo 2007.
 
La via Ṝutti supra lu Tiatru. Davanti si vidunu puru li strutturi dâ machina tiatrali.
 
Lu Tiatru ndo 2007, doppu cha si sdirrubbarunu li casi.

Si canusci 'nu tiatru a Catania grazij alli fonti 'ntornu la verra dô Pilupunnesu, unni si dici cha Arcibiadi parrau ê kataniaioi (l'abbitanti di Catania greca) pri chiamalli all'armi contra Sarrausa ndo 415 a.C., propriamenti ntô Tiatru[1]. Ntê li fonti non si dici unni s'attrova 'stu tiatru e pri tradiziuni si crideva cha fussi lu Tiatru romanu cha si vidi oggi ô centru. 'Sta cunvinziuni, sbagghiata, s'ancancriniu e oggi la comunità lucali chiama la struttura Tiatru grecu e 'a stissa strata su cui s'affacci si chiama via Teatro Greco. L'allitrati cha sturianu 'stu monumentu si chiesuru siddu poteva essiri 'u stissu tiatru, macari ricustrujutu supra a chiddu chiù anticu: ci fu macari cui pinzava cha nun ci fossi 'ntiatru docabbanna[2]. Chiddi cha pinzavunu cha lu tiatru c'era, mmeci, ficiru prisenti cha lu Tiatru romanu è mparti scavatu comu chiddi greci e nno è misu supra nchianu, comu chiddi romani chiù tipici[3]. Ma di la struttura cha si vidi oggi nudda fonti ci parra, pirciò s'hanu usari li provi cha produci l'Archioluggìa pri capirici quarchi cosa.

La storia chiù 'ntica è tistimoniata dê grossi balati di carcari unni ci si po' leggiri ngricu KAT e fanu parti di chiddu cha si pinzava fussi 'ntiatru grecu di pianta quatrata, comu chiddi di l'ebbìca ellenistica. Li primi parti s'attruvaru ntô 1884 e ntô 1919 e si pinzava cha fussiru dô V sèculu a.C.. Si cunfirmau la struttura quatrata quannu ntô 2007 s'attruvau n'autru muru grecu a ponenti, ma s'addatau ccu precisiuni a lu IV sèculu a.C.[3]. 'Stu tiatru fu ricostrujutu ntô I sèculu, doppu cha Catania addivintau colonia romana e priciò s'arricchiu. Nta 'stu tempu si rifici lu muru di ponenti mpetra lavica pricchìni li balati di carcari s'avunu distruggiuti; si ficiru macari li sedili chiù 'ntichi, chiddi vasci scavati 'nta collina[3].

Ndo II sèculu, forsi grazij ê sordi cha eppi dô mpiraturi Adriano, lu Tiatru s'allarga, addiventa maestusu assemi ê termi cha s'attrovunu ê sô spaddi (la Rutunna) e autri edificij. S'arricchisci di statui, culonni, basamenti: unu di chisti basamenti s'attrova ô Castiddu Ursinu e supra c'è 'nu rilievu cu' la Vittoria cha duna la curuna a 'ntrufeu, mentri a latu si vidinu li barbari lijati; chisti putissuru essiri li Germani suttamisi dô mperaturi Marco Aurelio o Commodo[4][5]. Lu Tiatru pigghia macari 'na forma menza circulari e ci s'aggiungi lu prosceniu allicchittatu dô marmoro, la nova scena chiù ranni e la costruziuni di dui beloardi ê lati, unni ci stavunu li scali pri acchianari[3].

Nta st'ebbìca si jungiunu marmori e dicuraziuna: freggi, statui, rilevi e culonni cha foru arrubbati ntô passatu o foru pigghiati pri costruiri autri cosi, comu pri l'asempiu la Cattidrali di Sant'Àjta.

Lassatu e persu ntô VI e VII sèculu, comu autri monumenti di l'antichi[6], ntempu nenti ci si costruenu supra assai abbitaziuna autu-mirievali. La zzona di l'orchestra ci ficiru na chianca di voi, mentri l'autri parti foru scavati pri farici casi d'abbitaziuni.

Cu' tuttu cha fu sdirrubbatu, maniatu e canciatu - ntô XVI sèculu ci costrueru macari stratuzze cha passavunu di na parti a l'autra - la forma circolari dô munumentu si putianu léggiri ccu facilitati e si vidìa macari ntê carte dô XVI sèculu e dô XVII sèculu. Ntô 1693 lu trimotu dô Valdinotu sdirrubbau assai dê casi cha erunu supra la cavea e supra li macerij ci custrueru autri abbitaziuna e ntô XVIII sèculu ci ficiru supra macari la via Ṝutti, cha passa di parti a parti lu monumentu dâ miridiana â tramontana e junceva la strata dô Corsu (via Vittoriu Imanueli II) cca chiazza arrera ô Tiatru. Da 'sta strata, comu si vidi ncerti fotu di prima cha la sdirubbavunu, partivunu vanidduzzi e macari na chiazzedda.

Quannu finìa lu XIX sèculu lu patruni dô palazzu cha è mpicatu all'Odeon fici sdirrubbari l'urtumu fornici pri allargari lu so' palazzu. 'Stu fattu fici nichiari lu Comuni cha s'addicidiu di mannari fora cu abbitava supra li dui Tiatri pri libberalli. Lu travagghiu di libbiraziuna nun fu mai cunchiuruta. Mprimisi si pinzau a libbirari l'Odeo, appoi nde l'anni '50 dô XX sèculu e pri vint'anni s'allibbirau lu Tiatru. Ndo 1979 e ndo 1980 si ficiru autri scavi a livanti e s'allibbirau l'angressu di l'atturi e 'na scaledda mpetra lavica.

Doppu lu 1997 ficiru autri scavi cu' n'autru pinzeru di scavu: lassari quarchi edificiu pri testimuniari l'antica Catania e li storij cha subìu lu Tiatru. Accussini nascìu l'Antiquarium dô Tiatru cha s'attrova nta palazzina di unni si trasi pô Tiatru e la Casa Libérti, 'na palazzedda supra la summa cavea, ni l'anculu tra livanti e la tramuntana. Dê l'anni '70 ci ficiru spittaculini musicali l'astati, ma ndo 1998 si spustaru ô mfitiatru dê Cimineri. Auoggi si po' visitari tranni li parti cha ancora si stannu scavannu e sturiannu.

Studij

cancia
 
Trasuta dô latu di ponenti ô Tiatru, si vidi puru l'Odeo.
 
Trasuta ô Tiatru dâ via V. Imanueli II: la culonna di marmoro supra 'na basi di petra lavica è dô Mirievu, mentri lu tettu di lignu è dô Setticentu.
 
Latu a livanti dô Tiatru, câ trasuta pri la scala di l'atturi.

Lu Tiatru, cha ancora si videva nta trama di la civitati, vinni sturiatu pir primu di Lurenzu Bolanu[7] e di Tomasu Fazellu[8], d'issu scriveru macari li storici dô XVII sèculu cha trattaru l'antichitati di Catania, comu puru Vitu Amico. Lu primu scavu archiuloggìcu lu fici Ignaziu Paternò Castiddu ndo XVIII sèculu[9] cha pri primu usau tecnichi moderni pô scavu: la trincea, ghinghiri lu scavu cô stissu matiriali nisciutu e la signalaziuni dô scavu fattu di modu cha turnannu supra ô scavu si putìa arricanusciri chiddu cha già s'ava scavatu. Chissu forsi pricchìni iddu c'avia ntenziuni di turnarici[10]. A ponenti vitti lu lastricatu romanu e â scala, cha Bastianu Ittar disignau pri farini l'incisiuni cha si vidi ô Castiddu Ursinu[11].

 fini dô XIX sèculu fu visitatu di Adolf Holm cha fu lu primu a diri cha potìa aviri 7000 cristiani[12], ma nun ci fu nuddu cha cuntrullau 'stu datu chê novi nfurmazziuni cha iddu appi cu' ncarculu di li misuri dô Tiatru, cunfruntannu cu' l'autri tiatri cha canusceva. Nda 'st'ebbìca parti puru lu primu travagghiu pri libbirari l'edificij antichi e ntô 1884 s'attruvau nmuru grecu di balati di carcari e ndo 1919-1920 s'attruvau puru la scritta KAT, comu supra certi picciuli di Catania greca, unni voli diri Katane, l'anticu nomu di Catania.

Ndi l'anni '50 si ficiru li travagghi chiù rossi, cu' Guido Libertini, cha misiru luci â cavea e tiraru fora morti marmori. S'arripigghiaru li scavi ndo 1979 a livanti, supra 'a cavea e l'orchestra pri luvari li macerij dô trimotu dô 1693. Cca s'attruvau mpezzu di la facci di 'na statua dô mperaturi Marco Aurelio: si potti complitari cu' n'autru pezzu cha s'attruvau vent'anni chiù tardi chiù versu tramontana.

L'urtima campagna accominciau ndo 1998 e libirau morti parti dâ zzona dô livanti e si fici macari lu percorsu pri visitari lu Tiatru, abbissannu certi casi pri farini offici, zoni pri esposiziuna, saluna pê confirenzi. Stu scavu fici canusciri puru lu rapportu tra la civitati e lo monumentu, tra lu monumentu e la so' storia, ammustrannu parti dô Tiatru grecu cha ora si poru datari ô IV sèculu a.C. enno ô V comu si cridìa. Si potti macari capiri quantu era granni 'stu primu tiatru e unni s'attruvava lu so' santuariu.

Struttura

cancia
 
Trasuta dâ via Vittoriu Imanueli II, unni ci su l'amministraziuni, la bigghiettaria, lu saluni d'accughienza.
 
Versu livanti: lu parodos e lu sistema dâ scena, chiddo cha fu chianca ntô Mirievu.
 
Carceres dô Tiatru, appoi abbitaziuni.
 
Versu nternu: si vidinu li marmori cha facivunu parti dô Tiatru e ntô Ottocentu foru abbiati ntô lu corridoru di menzu.

a strùttura cha si po' viriri apparteni alli granni costruziuna di l'ebbìca antinina e gliè furmata di 'na scena articulata e monumentali cu' tutti li culonni e li finti pruspettivi, 'nu pulpitum allicchittatu di marmori, l'orchestra cô diamitru di quarchi 22 metri in opus sectile a cerchij e quatri, distruggiuta e abbissata mpocu mali ntô IV sèculu, cha soventi si jnchi di aqua di na sorgenti cha s'attova sutta la Muntivirgini, cha alli vôti si pinzau malamenti fossi lu ciumi Chamasenu[13]. Lu Tiatru havi puru li dui parodoi appizzati di li casi custrujuti supra, una di li carceris cha addivintau palazzedda e la cavea cha havi 98 mtra di diamitru. La cavea avìa vintunu serij di sedìli ccu dui praecintiones cha li dividianu, mentri verticalmenti c'erunu novi punte e ottu scalazze. Li dui praecintiones tagghiavunu la cavea in: ima, media e summa, siddu era di jusu, di menzu o di susu. La sula cavea scavata era la ima, l'autri erunu supira mura e c'havianu varij passaggi pri gghiri di 'nabbanna all'autrabbanna, mentri cha fora niscevunu tanti vomitoria, li trasuti e nisciuti pri li corridori cha s'attrovunu sutta a la media e la summa cavea.

Li statui cha allustravunu la scena avianu temi vari: mitologgìci o celebbrativi di mperaturi. Tra chiddi mitologgìci lu gruppu chiù nteressanti è 'a Leda cô Cignu, copia romana dâ statua di Timotheos dô 360 a.C., mentri 'na lastra cu 'na fera è tra li dicuraziuna chiù mportanti, forsi divisoriu pri li posti chiù mportanti, vistu cha cinn'erunu quarchi tri sicuru. Puru i sidili erunu vistuti 'nmarmoro jancu e davunu n'effettu particulari e urigginali ô Tiatru cô niuru dê balati mpetra lavica. Li marmori foru arrubbati o pigghiati pri fari novi costruziuna e macari pri la cattidrali dô 1094, unni ci sunu ancora li capitelli, li culonna, pezzi di statui pri farini pezzi di la muratura[14]. pri Bastiano Ittar li culonne foru parti di nu loggiato comu lu famosu Tiatru di Taormina. Fora s'aprivunu di l'urtumu corridoru assai porti, cha si ponu vidiri, ma non si ponu praticari tutti. 'Ste porte erunu serrate di dui leseni cha facevunu jochi di luci e ùmmira, comu già fu pri lu Tiatru di Thermae Himerae[15]; appoi quattru nicchij si grapevunu ni quattru corpi cha niscevunu di la curva dô Tiatru, forsi c'erunu intra statui de' dei[16].

'A scena è ancora cummigghiata di li palazzi dô XVIII sèculu e 'na palazzedda ci fa di trasuta e teni tanti parti mirievali, comu 'na scaledda e 'na culonna, cha teni lu tettu dô Setticentu. Chabbanna s'attrova macari l'antiquarium unni si ponu vidiri pezzi dô Tiatru e dê palazzi, dô I sèculu nzinu ô XVII e macari parti di 'na casuzza dô Cinqucentu cha avìa 'na direzziuni cha cangiava pri comu va lu Tiatru. Supra l'orchestra ci sta ancora la via Ṝutti dô Setticentu. Tra li casi chiù significativi cha ancora stannu supira lu Tiatru ci stanu lu Palazzu Gravina-Cruyllas, Casa Libérti[17] e Casa dell'Androne[18]. Ntô 2007 s'attruvau la Casa del Terremoto, 'na casuzza cha crullau cô trimotu dô 1693 e cha sarvau tutti l'interni dô sô tempu, pricchìni di supira ci ficiru autri casi cha cummigghiarunu 'sta casuzza.

Ê lati ci su' dui trasuti pri l'atturi, chiddu a livanti si junci cu' la trincea di Biscari - ntra li palazzi de' Principi Valsavoja e de' Gravina[19] - e chiddu di punenti cu' l'Odeo.

Dintra la Casa dell'Androne s'attruvau puru parti di 'nu themenos, 'nmurettu cha sirviva pri isulari la zzona sacra di lu santuariu mportanti. Forsi cha lu santuariu è 'u stissu dâ stipe votiva di chiazza San Franciscu[20], forsi priciò ntempiu di Persefone o Demetra[3].

Noti

cancia
  1. ↑ Tucidide, VI 50, 3 sgg.; Sesto Giulio Frontino, Strateg. III 2, 6.
  2. ↑ Lu prufissuri Tortorici dâ Universitati di Catania pinzava ci putissuru essiri li mura di l'antica civita; cfr. E. Tortorici, «Osservazione e ipotesi sulla topografia di Catania antica», in Lorenzo Quilici, Stefania Quilici Gigli (a cura di), Edilizia pubblica e privata nelle città romane, Volume 17 dell'Atlante tematico di topografia antica, L'Erma di Bretschneider Ed., 2008, ISBN8882654591, 9788882654597, p. 110.
  3. ↑ 3,0 3,1 3,2 3,3 3,4 M. G. Branciforti, G. Pagnano, op. cit..
  4. ↑ AA.VV., Il Museo Civico a Castello Ursino – Introduzione al nuovo ordinamento, Catania 2000, p. 23.
  5. ↑ Antonino Scifo (a cura di), Catania Urbs Clarissima - 728 a.C.-1693, edizioni Sémata, Enna 2003, p.34.
  6. ↑ Ntô V sèculu Teodorico lassau cha i catanisi pigghiassuru li pezzi di l'amfitiatru acciocché facivunu li loro casi; cfr. R. Soraci, Catania in età tardoantica, «Quaderni catanesi di Cultura classica e medioevale» 3, 1991, pp. 269-270.
  7. ↑ Guido Libertini, «Lorenzo Bolano e l'indagine archeologica catanese nel secolo XVI», in Archivio Storico per la Sicilia Orientale, XVIII, 1922.
  8. ↑ «Dell'Historia di Sicilia,/ del R.P.M. Tomaso Fazello,/ Siciliano dell'Ordine de' Predicatori,/ Divise in venti libri./ Tradotte dal latino in lingua toscana dal P./ M. Remigio Fiorentino, del medesimo Ordine./ Nella prima decha: s'ha pienissima cognitione di tutti i luoghi della/ Riviera, e fra terra dell'Isola./ Nella seconda, si contien tutto quello ch'è seguito in Sicilia, da' pri-/ mi habitatori, per fino alla felicissima memoria di/ Carlo Quinto Imperatore./ Con tre tavole. La prima de gli Autori citati nell'Historia; la seconda de' Capitoli;/ e la terza, delle cose più notabili contenute in quella./ In Venetia, appresso Domenico, & Gio. Battista Guerra, fratelli./ M. D. LXXIIII.» III p. 93. Fazellu scrivi cha c'era puru 'na parte del muro, ch'è rivolta verso Leontini (...), la quale per esser di pietre negre tirate in quadro, mostra in se stessa una grandissima magnificenza, forsi li resti di la palestra dô Tiatru.
  9. ↑ Ignazio Paternò Castello, Viaggio per tutte le antichità della Sicilia, Stamperia Simoniana, Napoli 1781, p. 29.
  10. ↑ I. Paternò Castello, op. cit., p. 30.
  11. ↑ 'St'incisiuni facìa parti dâ Raccolta degli antichi edificj di Catania. Rilevati e disegnati da Sebastiano Ittar Architetto e Disegnatore di Ruderi. A Milord William Bentinck Ministro Pluripotenziario della gran Brettagna in Sicilia, Catania 1812.
  12. ↑ Adolf Holm, Catania Antica, traduzione, note e cura di Guido Libertini, Tirelli, Catania 1925.
  13. ↑ Si parrau soventi di 'staqua, cha fussi usata pri fari li battaghij navali, ma nun ci su provi, anzi: l'orchestra s'accuminciau a jnchiri doppu cha ntê l'anni '50 si fici 'na jttata di cimentu pri fari la fognatura di la via Vittoriu Imanueli II, priciò è facili cha l'orchestra si jnchi di aqua pricchìni chista non poti chiùi truvari la strata pô mari; cfr. M. G. Branciforti, G. Pagnano, op. cit..
  14. ↑ Unu di chisti, 'nu piedritto di 'naltari dô sèculu XVII, lu ficiru tagghiannu 'na statuedda di 'na fimmina nura e giratu dâ parti liscia. Auoggi lu pezzu s'attrova ntô Museu di la Curia.
  15. ↑ Vidi Francesca Rivieri, Tiziana Consoli, «Odeon di Catania», in Luigi Marino, Carla Pietramellara (a cura di), Tecniche edili tradizionali: contributi per la conoscenza e la conservazione del patrimonio archeologico, Volume 5 di Restauro archeologico, Alinea Editrice, 1999, p. 176.
  16. ↑ Si diìa cha una c'havìa 'a statua di Vennìri; vidi M. T. Di Blasi, op. cit..
  17. ↑ Fu custrujuta supira ô sicunnu chianu di mpalazzu dô Rinascimentu cha havi ancora li sô dui protali e cha appartinìa â Curia di Catania. La famigghìa Libérti l'happi comu urtimu patruni e la desi ô Comuni solu siddu prumittìa di farini spazij musiali: auoggi chabbanna ci su' esposti cosi de' Libérti e cosi attruvati ntê scavi dô Tiatru, comu li cosi preistorichi, grechi, romani, mirievali o li maiolichi cha venunu di la Casa del Terremoto.
  18. ↑ Cha ntô XVIII sèculu s'avìaffari 'na casa granni cu' 'n granni saluni pri trasiri, ma fu l'unica cosa cha si fici, pricchìni fineru li sordi. Lu palazzu fu vinnutu e ci ficiru assai appartamenti chiù nichi. Auoggi ci su' appinnuti nde so' pareti li rilevi dô Tiatru, di la civitati e dô so' monumentu, antichi illustraziuna.
  19. ↑ La trincea havi puru 'ncanali cha purtava l'aqua a l'oprari pri arrifriscalli e partia da 'n pozzu assai aliacanti.
  20. ↑ Giuseppe Rizza, Stipe votiva di un santuario di Demetra a Catania, in «Bollettino d'Arte» 1960.

Bibliùgrafìa

cancia
  • Ignazio Paternò Castello, Viaggio per tutte le antichità della Sicilia, Napoli1781.
  • Dipartimento regionale dei beni culturali e dell'identità siciliana, Maria Grazia Branciforti, Giuseppe Pagnano (a cura di), Il complesso archeologico del Teatro e dell’Odeon di Catania, Regione siciliana, Assessorato dei beni culturali, ambientali e della pubblica istruzione, Dipartimento dei beni culturali, ambientali e dell'educazione permanente Palermo 2008, pp. 229

Lìami di fora

cancia


Siti archiològgichi di Catania
 

Antichità di Catania; Foru rumanu; Anfitiatru rumanu di Catania; Tiatru rumanu di Catania; Odeon; Termi di Catania; Termi Achilliani; Termi di lu ndirizzu; Pantiùni; Petra do' Malucunsigghiu;

Estrattu di "https://scn.wikipedia.org/w/index.php?title=Tiatru_romanu_di_Catania&oldid=749797"