Tummasu Moru

Thomas More, sicilianizzatu 'n Tummasu Moru (Londra, 7 di frivaru 1478 – Londra, 6 di giugnettu 1535), fu umanista, scrittori e omu pulìticu anglisi; veni viniratu comu santu di la Cresia cattòlica e di chidda anglicana.

Tummasu Moru ntô 1527

Ntî lu scùrriri di la sò vita si vadagnau fama a liveddu eurupeu comu autori umanista e tinni macari assai càrrichi pùbbrichi, comu chidda di Lord Cancilleri di Nghirterra ntra lu 1529 e lu 1532 sutta lu re Enricu VIII. Cattòlicu, lu sò rifiutu di accittari l'Attu di Suprimazzìa di lu re supra la Cresia ntî la Nghirterra fici finiri la sò carrera pulìtica e lu cunnucìu a la pena capitali ccu l'accusa di tradimentu. La Cresia cattòlica e chidda anglicana lu cunzìdiranu santu; ntî lu 2000 papa Giuvanni Paulu II lu pruclamau patronu di li cuvirnanti e di li puliticanti.

Tummasu Moru criau la palora "utupìa" e ccu sta palora annincau n'ìsula mmagginaria addutata di na sucità idiali, ca discrivìu ntî la sò òpira cchiù canusciuta, Utupìa, pubbricata ntî lu 1516.