Salutamu.
Mi chiamu Stefano Grillo. Nascivi 30 anni nnarreri 'n-Trapani, o chiuttostu a Erici, n-cumuni ncucchiatu a lu cumuni di Trapani. Lu fattu è ca lu spitali di Trapani s'attrova nna lu cumuni di Erici, pri chissu tutti chiddi chi nascinu nna lu spitali di Trapani s'attrovanu nna la carta d'idintità ca nasceru a: ERICE. 'N-Trapani c'è n-pruverbiu ca dici: "si nasci a Erici, si vivi 'n-Trapani e si mori a Pacecu". Sì, pirchì nun sulu lu spitali di Trapani s'attrova nna lu tirritoriu di lu cumuni di Erici, pri junta lu campusantu di Trapani s'attrova nna lu territoriu di Pacecu, n autru cumuni vicinu. Comu putiti capiri, Trapani è n-postu tanticchia curiusu... Erici, mmeci, è na magnifica citati medievali, ca s'attrova n-capu a lu Munti Erici (anticamenti: Munti San Giulianu), ca li trapanisi, pri cummurità, chiamanu 'u Munti, e chiamano a cu ci abbita Muntisi.
