Arfiu (nomu)

Arfiu è un nomu propiu di pirsuna sicilianu maschili.

Varianti

Affiu, Alfiu

Etimoluggìa

Diriva dû nomu latinu Alphius, d'orìggini oscu-umbra, prubbabbirmenti currispunnenti a lu latinu Albius e ô grecu Alphios, ca signìficanu tutti dui "biancu, càndidu" ('n latinu "albus" e 'n grecu "alphos").

Onumàsticu

Veni fistiggiatu lu 10 di maiu, data dû martiriu, nzèmmula ê frati Filaderfu e Cirinu.

Santi e Biati

Sant'Arfiu màrtiri. Lu martiriu dî santi Arfiu, Cirinu e Filaderfu avvinni a Lintini 'n pruvincia di Sarausa ca tannu era un grossu centru e capulocu dâ Magna Grecia, ntô 253 doppu Cristu. A Sant'Arfiu fu strappata la lingua pirchì era lu portavuci dî tri frati e era ncurriggìbbili nta l'arrispùnniri a Tertullu, guvirnaturi di Roma di stanza a Lintini, San Filaderfu fu misu supra la gratìcula supra lu focu, San Cirinu fu cottu nta l'ogghio vugghienti. Ancora a Lintini asìstinu li lochi di lu martiriu e dâ priggiunìa di Sant'Arfiu di San Cirinu e San Filaderfu. Li tri Santi arrivaru a Lintini, pruvinennu di Vaste 'n Pugghia.