Calòggiru Vizzini
Calòggiru Vizzini (Villarba, 24 di giugnettu 1877 - 12 di giugnettu 1954), megghiu accanusciutu comu Don Calò, è cunzidiratu nu capu dâ mafia siciliana ca appi putiri suprattuttu ntô tempu di l'uccupazzioni dâ Sicilia di l'esèrcitu alliatu.
Lu patri era nu viddanu mentri li sò frati, Giuvanni e Peppi, si fìciuru tutti dui parrini. Diversamenti dê sò frati, Calòggiru nun finìu li scoli elimintari arristannu menzu analfabbeta. Arristau assai tempu sutta la prutizzioni di Franciscu Paulu Varsallona, cunzidiratu n'òmunu d'unuri ca avìa quarchi cuntu 'n suspesu câ justizzia. Quannu Varsallona vinni attaccatu ntô 1903, lu carusu Calòggiru era già assai canusciutu ntô "giru" e vinni, doppu picca tempu, cunnannatu a 20 anni pi frodi, curruzzioni e diversi ammazzatini ma vinni scaciunatu picchì avìa assai amicizzi ca ci fìciuru forti àlibbi.
Ntô 1931, ntô mentri dû pirìudu fascista, fu mannatu luntanu dâ Sicilia picchì suspittàvanu ca avìa assai stritti cuntatti câ mafia e arriniscìu a turnari sulu ntô 1937. Rispittatu di tutti, addivinìu sìnnucu di Villarba â fini dâ guerra e assai capi mafiusi grazzi a iddu foru misi 'n lìbbirtà, dannu nu furtìssimu cuntribbutu pâ rinasciuta dâ nova mafia.
Spummintau a Palermu la "Fabbrica di confetti e dolciumi" 'n sucità cu Lucky Lucianu. La fàbbrica vinni pirò chiuduta nuttitempu pi càusa di nu artìculu ca cumparìu ntî nu jurnali dû 1954, unni vinìa affirmatu la granni pussibbilità ca nichi quantità di eruina putìanu pigghiari lu postu dâ mènnula. Don Calò morsi di vicchiània a l'etati di 77 anni, lassannu nu patrimoniu valutatu diversi migghiardi di liri fattu ntî cchiù picca di deci anni.