Mariu Scelba (Caltaggiruni, 5 di sittèmmiru 1901Roma, 29 di uttùviru 1991) fu n'omu pulìticu sicilianu. Fu prisidenti dû cunzigghiu talianu ntô pirìudu ca va dû 10 di frivaru 1954 ô 22 di giugnu 1955.

È cunzidiratu, secunnu li punti di viduta, l'omu ca, riurganizzannu li forzi di l'òrdini, sarvau lu statu dimucràticu 'n Talia dû suvvirsivismu cumunista e dû niufascismu, zoè l'omu sìmmulu dâ riprissioni pulizziesca dû dissenzu di l'anni 1950ini.

Scelba e la straggi di Purtedda dâ Ginestra cancia

Doppu la straggi di Purtedda dâ Ginestra, succiuduta lu 1 di maiu 1947, lu sò nomu vinni fattu di Gaspari Pisciotta, locutinenti di Turi Giulianu, e di àutri banniti 'n rilazzioni ê gravìssimi fatti succiuduti 'n Sicilia. Di diversi stòrichi hà statu innicatu comu lu puntu chiavi dê liami di putiri ca, nti na manera o nti n'àutra, cuntribbueru â straggi midìsima e ca, pi cancillari finutivamenti ogni trazza, dicritaru appoi lu dilittu dû capubanna di Muntilepri, lu 4 di giugnu 1950. Ricustruzzioni e ipòtisi attinnìbbili supra ddi fatti risùrtanu ntô libbru Il binomio Giuliano-Scelba di Carlu Ruta (1995), nti Salvatore Giuliano di Giuseppi Casarrubea (2001) e nti Segreti di Stato di Paolo Benvenuti (2003).

Liggi Scelba cancia

Pubbricata ntâ Gazzitta Ufficiali n°143 lu 23 di giugnu 1952, la liggi n°645 (cchiù cumunimenti canusciuta comu, appuntu, "Liggi Scelba") vieta l'apoluggìa dû riggimi Fascista e dû Partitu Nazziunali Fascista, classificata comu riatu.