Zoccu cumunimenti veni difinutu razzismu è nu nzemi d'attiggiamenti cchiù o menu marcati, d'azzioni cchiù o menu manifesti, di priggiudizziu nigativu e/o discriminazzioni supra basi etnica e/o razziali.  Cumunimenti lu razzismu è n'ideoluggìa ca prufessa la supiriuritati di na razza rispettu a n'àutra e justifica n'evintuali discriminazzioni e/o upprissioni di chiddi li quali sunnu cunziddirati nfiriuri.

Prupaganna antigiappunisi nta l'secunna guerra munniali.

E' pussìbbili spigari lu razzismu comu l'esaspirazzioni dû tassu d'etnocintrismu fisiuluggicamenti prisenti ntâ sucitati, n cunnizioni di cumpitizzioni ecunòmica ntra gruppi nti un cuntestu di risursi limitati. N stu quatru tri sunnu li cunnizzioni funnamintali pû manifistàrisi dû razzismu:

  1. hannu a esistiri dui gruppi suciali distinti e chiaramenti idintificàbbili.
  2. havi a esistiri na cumpitizzioni ntra sti dui gruppi, puru putinziali.
  3. cci havi a èssiri n'asimmetria nta l'accessu ô putiri ntra li dui gruppi.

Autru fatturi di cunziddirari nti na pruspèttiva sturica, è ca lu razzismu è nu finòminu rilativamenti ricenti e è strittamenti cunnessu a l'etati culuniali, quannu li granni putenzi europei svilupparu ideoluggìi razzisti pi risulviri la dissunanza ntra valura cristiani d'aguagghianza e caritati e lu sfruttamentu dî pupulazzioni ndiggeni n Amèrica comu n Africa.

Lu razzismu scintificu cancia

Razzismu scintificu è lu tèrmini utilizzatu pi ndicari na particulari forma stuica di razzismu urganizzatu, funnata a partiri di lu XIX° sèculu n Europa e ntê Amèrichi, ca nasci n àmmitu univirsitariu ntra li scienzi naturali e suciali di l'èbbica, prinnennu nizziu dâ bioluggìa, di l' antropoluggìa, dâ ginitica, dâ midicina, dâ criminoluggìa e dâ sociuluggìa, rifacènnusi n manera spissu distorta â tiurìa evuluzziunista di Charles Darwin e ô pusitivismu.

Primisa òi ritinuta nfunnata di sta tiurìa pseudoscintifica fu chidda di ritèniri ca l'èssiri umani fussiru custituuti di razzi diversi, ogniduna ôn gradu diversu d'evuluzzioni rispettu a l'àutri, e ca li mitodi di classificazzioni dâ zooluggìa putìanu èssiri utilizzati pi ndagari li carattiristichi dî stissi. N sta classificazzioni s'ammiseru graduatorii ca prisuppunìanu arcuni "razzi" èssiri supiriuri pi liveddu evulutivu e ntillèttivu a l'àutri. N particulari idda cridetti di ducumintari ca la cussiditta "razza janca" (o ariana) fussi lu liveddu massimu ragghiuntu di l'evuluzzioni naturali dâ specii umana.

Sustinennu l'esistenza di "razzi supiriui" sti tiurìi desiru lu via â nascita di l'eugginitica (eu = bona genia = discinnenza), àutra pseudoscienza ca mirava â prisirvazzioni dâ purizza dû patrimoniu giniticu dî pòpuli "janchi", sustinennu na campagna pulìtica cuntra li matrimoni e li rapporti ntirrazziali ca putissiru purtari â nascita di figghi "razziarmenti mpuri" e digginirati.

Assirtura di sta tiurìa foru espunenti di primu chianu, ô massimu liveddu, dî scienzi naturali e suciali di tuttu lu munnu, p'oltri un sèculu. La classificazzioni dî cussidditti "razzi" fu lungamenti utilizzata pi raciuni pulìtichi, e dibbattuta ntra li scinziati, ca non arriniscìanu a ragghiunciri risultati univirsarmenti cundivisi. Majuritariamenti, dû 1870 ô 1936 idda sustinìa la supiriuritati di na prisunta "razza nurdica" o girmanica (ntâ quali èranu nclusi li italiani dû nord), supra tutti l'àutri, ntra cui chidda miditirrania italica.

Usati duranti lu XIX° sèculu a sustegnu dû culunialismu e dû drittu â schiavitù, l'esitu pulìticu cchiù vistusu di sti tiurìi ntô XX° sèculu foru li liggi razziali n tanti parti di lu munnu (USA, Sudafrica, Girmania, Italia...), e lu stèrminiu nazzista.

Lu razzismu scentificu vinni rifiutato puliticamenti e scintificamenti sulu doppu la fini dâ Sècunna Verra Munniali, quannu câ pubblicazzioni dâ «Dichiarazzioni supra la razza» ntô 1950 l'UNESCO dicritau n manera ufficiali la nun esistenza dî razzi umani e ncuraggiau li nummàrusi biologi a arricurdari custantimenti l'assenza di validitati scintifica dâ nuzzioni di "razzi umani".

A siquitu di zò li stissi tiurìi nun sunnu però dû tuttu scumparsi, ma ancora òi vennu n granni banna riattualizzati d'arcuni estremi minuranzi pulìtichi simpricimenti sustituennu â palora "razza" chidda d' "etnia", "pòpulu" o "civirtati". Sustituennu a l'elimentu bioluggicu (nun cchiù riprupunìbbili) chiddu culturali, iddi arrinèscinu a mantèniri ntatta la stissa pricidenti mpustazzioni "pseudo-scientifica".

Lu razzismu scintificu fu pricidutu, asciancatu e siquitu d'àutri formi di razzismu urganizzatu, dittu macàri pri-scintificu. Ntô mèritu di st'urtimu la palora "razza" nun è rifiruta ôn tipu bioluggicu, ma ô sensu cchiù ginirali di "catigurìa" o "gèniri". St'àutra forma di razzismu nun è menu mpurtanti, e n dittagghiu prenni tanti noma spicifici a secunnu di l'uggettu dâ discriminazzioni: classismu siddu rifirutu â discriminazzioni n basi â classi suciali, castèismu siddu n basi â casta d'appartinenza, sèssismu siddu n basi ô sessu, ecc.

Tesi duminanti òi, ca tenta di spiègari li causi di lu razzismu urganizzatu e scintificu, è chidda utilitarista: lu razzismu zoè nascissi privalintimenti di mutivi d'utilitati pulìtica, a difisa dî privilèggi, di l'ecònumia e di lu putiri di na fazzioni cuntra l'àutra. 

Lu razzismu "ndividuali" mmeci è cunziddiratu dâ psicoluggìa un gravi disturbu mintali di tipu narcisisticu, comu macàri la xenofobbia.

Storia dû razzismu ntô munnu mudernu cancia

Ntô XIX sèculu, n Europa e n Amèrica, arcuni scinziati svilupparu varii tiurìi supra li diffirenzi bioluggichi ntra li "razzi" e sti tiurìi foru a sò vota strumintalizzati pi liggittimari pusizzioni e pratichi razzisti. Tanti di sti tiurìi foru di tannu abbannunati dâ cumunitati scintifica pirchî ritinuti errati o pirsinu pseudoscintifichi.

Nta l'USA cancia

Ntâ Mèrica culuniali, ancora prima ca la schiavitù culuniali divinissi cumpritamenti basata supra basi razziali, migghiara di schiavi africani èranu a lu sirvizziu dî janchi, a ciancu d'àutri travagghiatura nun libbiri janchi vinculati di cuntratti a tèrmini. N arcuni casi lu tèrmini dû sirvizziu pî schiavi africani significava libbirtati e la cuncissioni dûn tirrenu, ma chisti abbinìanu raramenti, e pochi africani divinniru prupitari tirreri n stu modu.

Ntô 1676, Nathaniel Bacon cunducìu na rivolta cuntra lu cuvirnaturi e lu sistema di sfruttamentu ca rapprisintava: lu sfruttamentu di li culoni cchiù pòviri di parti dî prupitari tirreri sempri cchiù ricchi. Bacon comegghiè murìu, forsi di dissinteria, e la rivolta cissau. L'unitati di lu muvimentu pupulista di Bacon era chiddu ca priaccupava chiassai li prupitari tirriri, e divinìa ergu stratèggicu attruvari na manera di dividiri puliticamenti la pupulazzioni pi cuntrullàrilla. Pû cuvirnaturi l'aspettu cchiù nun aspittatu e amminazzusu dâ rivolta di Bacon era la sò multirazzialitati.

Accussì, di ddu mumentu n appoi, li ricchi prupitari diciseru/dicideru ca sulu l'africani avissiru stati utilizzati comu schiavi, e ê culoni janchi vinniru prumisi li binifici c'avissiru stati risirvati a l'africani siddu avissiru cuntinuatu a aviri cuntratti di sirvizziu a tèrmini. Stu canciamentu detti abbiu ô longu e nfami piriodu dâ sucitati schiavista miricana, ntâ quali li schiavi vinìanu sfruttati pi l'agricultura, e nutivurmenti ntâ pruduzzioni di cutuni e tabbaccu. Ntô nordest la schiavitù era menu cumuni, di sòlitu riligata ê sirvitù dumèstica "nun vuluntaria". La siparazzioni suciale basata supra lu culuri dâ peddi pirmiau prestu ogni aspettu dâ cultura culuniali miricana.

La schiavitù ntê stati cunfidirati tirminau ufficiarmenti câ Pruclamazzioni d'Emancipazzioni (Emancipation Declaration), ca vinni emanata ntô 1 di jinnaru 1863 dû prisidenti Abraham Lincoln. La schiavitù tirminau ntô paisi nteru cû tridicèsimo aminnamentu, ca vinni dichiaratu ratificatu ntô 18 di dicèmmiru 1865. Nunòstanti chistu, rimasugghi di razzismu rimaseru/rimaneru ntê Stati Unuti chî cussidditti liggi di Jim Crow, disparitati ntâ crianza (aducazzioni) e atti vandalici diffusi. Lu passaggiu dû Civil Rights Act ntô 1964 fu significanti ntô mudificari l'accittazzioni suciali di lu razzismu n Amèrica. 

Muvimenti cancia

Lu muvimentu miricanu graputamenti razzista cchiù canusciutu è forsi lu Ku Klux Klan, urganizzazzioni di cunfratirniti d' estrema dritta, ca prumovi la tiurìa dâ supranitati dâ razza janca. Ufficiarmenti lu Klan avissi abbannunatu la clannistinitati e la viulenza, scigghiennu na cchiù dimucratica lutta pulìtica. Doppu stu canciu di linia pulìtica, n Amèrica, si furmaru na miriadi di gruppi ca si rifanno a l'ideoluggìa e ô folclori nazzista, comu lu WAR (White Aryan Resistance), lu circuitu dû White Pride World Wide e lu Partitu Nazzista Miricanu.

N Italia cancia

A partiri di l'unificazzioni italiana l'establishment pulìticu e culturali italiani nfruinzatu dî tiurìi ntirnazziunali dû razzismu scintificu (vidi articulu ntâ paggina) dû pusitivismu e di l'eugginitica s'urintau versu pusizzioni razzisti e antimiridiunali (e tanti studiusi miridionali sustinniru a sò vota l'anti-miridiunalismu). Di stu clima pulìticu e culturali foru artifici ntra l'àutru li pubblicazzioni dû criminologu Cèsari Lumbrusu (auturi di saggi tinnenti a addimustrari l'innata natura criminali di li miridiunali e pû quali lu nteru pòpulu di lu Menzujornu assumi li cunnutati dû dilinquenti atavicu), li tiurìi di Giseppi Sergi, Luiggi Pigurini, Alfredu Nicèfuru (prisidenti dâ Sucitati Italiana d'Antropoluggìa e dâ Sucitati Italiana di Criminoluggìa, ca scrivìa: "La razza maliditta, ca pòpula tutta la Sardigna, la Sicilia e lu menzujornu d'Italia avissi a èssiri trattata aguarmenti cû ferru e cû focu - dannata â morti comu li razzi nfiriuri di l'Africa, di l'Australia, ecc".), di Enricu Ferri (sècunnu cui "la minuri criminalitati nta l'Italia sittintriunali dirivava dâ nfruenza cèltica), Gugghiermu Firreru, Arcancilu Ghisleri, nunchî di tantissimi àutri maggistrati, mèdici, psichiatri, òmini pulìtici, ca nfruinzaru grannimenti l'upinioni pubblica italiana e munniali.

Nun foru pusizzioni isulati, ô cuntrariu era la cumminzioni "scintifica" dâ quasi tutalitati di l'òmini di cultura europei, nunchî dî ceti diminanti e di l'upinioni pubblica di l'èbbica. Già ntô 1876 la tesi razzista fu chinamenti avaddata dâ cummissioni parramintari di nchiesta supra la Sicilia ca cunchiudiu: «la Sicilia s'abbicina macari cchiù a qualegghiè àutra banna d'Europa ê nfocati areni dâ Nubbia; n Sicilia cc'è sangu càuru, vuluntati mpiriusa, cummuzzioni d'animu rapida e viulenta». Zoè li stissi carattiristichi "psico-ginitichi" ca, cû stissu idinticu linguaggiu, li razzisti di tuttu lu munnu attribbuìanu â cussidditta "razza" niura. E di chistu èranu "accusati" li miditirranei: d'èsseri "mèticci", discinnenti di pupulazzioni priistorichi di razza africana e simitica.

Stu clima ditirminau tri cosi:

  1. Subbutu finu di l'unitati fu attuata na pulìtica di tipu culuniali ntê cunfrunti dû sud (spissu difinutu ntê jurnali di l'èbbica «Africa italiana»), ca purtau chiddu ca prima di l'unitati era lu statu cchiù riccu e sviluppatu d'Italia (lu Regnu dî Dui Sicili) â puvirtati quasi assuluta.
  2. Lu sud fu puliticamenti abbannunatu â criminalitati poichî idda vinni cunziddirata nun estirpàbbili, essennu intrinseca a na cultura nfiriuri e primitiva, fruttu dûn pòpulu ca essennu "reu" d'aviri avutu nfruenzi ginitichi "nigruidi" e simitichi era un pòpulu di "criminali nati" sècunnu la terminoluggìa dû Lumbrusu.
  3. Li cuverni dû regnu d'Italia smantillaru li gnustrii e li nfrastrutturi dû sud pi ricustruirilli ô nord. Chistu macàri picchì si ritinìa ca li sittintriunali, p'ìnnula razziali, clima, timpiramentu e supiriuri civirtati "janca" fussiru cchiù idunei a cumprènniri e gèstiri l'ecònumia dâ nazzionu.

L'attiggiamentu dû statu italianu, ca già ntô 1876 accittau la tiurìa di l'esistenza d'armenu dui razzi n Italia: l'euroasiatica (padana e "ariana"), l'euroafricana (centru-miridiunali e "nigruidi"), cuntribbuìu n modu ditirminanti â nascita dûn diffusu razzismu antimiridiunali ntô nord Italia e n tuttu lu munnu. Basànnusi supra li dichiarazzioni dî scinziati italiani li Stati Uniti di Mèrica desiru locu a formi espliciti d'apartheid pulìticu ntê cunfrunti dî miridiunali (n particulari ntê stati dû sud di l'USA: Alabbama, Virginia, ecc.). Cchiù n ginirali l'immigrati italiani vinìanu siparati ô sò arrivu a Ellis Island (New York), li sittintriunali vinìanu fatti sbarcari dû latu risirvatu ê "janchi" (whites) li miridiunali di chiddu risirvatu ê "nun janchi" (non-whites). Divisioni ufficiarmenti avaddata dâ Cummissioni Dillingham dû Sènatu dî Stati Uniti ntô 1911. A li siciliani appoi, pi via dâ cchiù ricenti (mediuèvali) cummissioni cu mori e saracini, spittava ntô prufunnu sud miricanu lu suprannomu/la nciuria di "white niggers" (negri culuri chiaru) oltri chiddu di "black dagos" (black = negru & dagos di dagger= accutiddaturi) cu cunsiquenti apartheid ecunòmicu, pulìticu e suciali. La sò paja era nfiriuri a chidda dî "niuri" e nzèmmula a iddi spissu èranu linciati pi futili mutivi: dû 1880 ô 1930, sècunnu li dati ufficiali, lu 90% di tutti li linciati "europei" nta l'USA èranu immigrati italiani, miridiunali e/o siciliani. E èranu spissu amminazzati dû Ku Klux Klan.

La stissa campagna razzistica si svulcìu n l'Australia e n àutri nazzioni di cultura anglosassuni, ma nun sulu. Finu a quannu, versu la fini di l' anni 1930 n Italia vinniru varati prubbidimenti, li cussidditti liggi razziali fascisti, principarmenti cuntra li pirsuni di riliggiuni ebbraica o d'uriggini simitica, a difisa di na prisunta "razza italiana". Ntô 1938 nfatti arcuni scinziati italiani suttascrisseru lu Manifestu dâ razza, notu macàri comu Manifestu dî scinziati razzisti, lu cui testu fu scrittu nti netta cuntraddizzioni chî pricidenti tiurìi, e n iddu si vosi affirmari - p'uppurtunismu pulìticu, duvutu a l'allianza câ Girmania - l'esistenza di n'unica iputetica "razza italiana", ntiramenti ariana. 

Lu "Manifestu dâ razza" dû fascismu assimilava li pòpuli latini miditirranei, prima cunziddirati nfiriuri, a chiddi girmanici e ariani, facènnuli ntrammi "puri ariani" e quinni razziarmenti supiriuri a tutti l'àutri (sèmiti, camiti, asiatici, slavi, ecc.). La sò pubblicazzioni cuincidiu cu chidda dî liggi razziali n Italia, ca foru rispunsàbbili dâ dipurtazzioni e uccisioni di cintinara di migghiara d'ebbrei, zingari e appartinenti a àutri etnii. Comu effettu gruttescu, l'annu doppu la pubblicazzioni dû Manifestu dâ razza, ntô 1940, li miridiunali nta l'USA divinniru ufficiarmenti "whites" (janchi).

Tuttavia nì stu ripèntinu e cortu canciamentu, nì lu succissivu capulinìa dû razzismu scintificu, rijittatu comu pseudoscienza subbutu doppu la Sècunna Verra Munniali, mudificaru la mintalitati furmata n casi un sèculu di prupaganna antimiridiunali. Formi nconsci e semi-clannistini di razzismu antimiridiunali pirsisteru finu a òi e sunnu spissu ducumintati di dinuncii pirvinuti a liveddu munniali. Oi st'anticu razzismu veni n granni banna riattualizzatu d'arcuni simpricimenti sustituennu â palora "razza" chidda di "cultura", "pòpulu" o "civirtati" e mantinennu ntatta la stissa pricidenti mpustazzioni "pseudo-scintifica".

Sècunnu arcuni sociuloggi n Italia a partiri di lu doppuverra l'ffetti di sta longa campagna prupagannistica avissiru datu locu a dui psicoluggìi: la prima ô nord sarìa carattirizzata di nu diffusu sintimentu narcisisticu d'esaggirata autustima (lu Nord guida murali d'Italia), la sècunna ô Sud avissi ditirminatu un vastu sintimentu fatalista, autucummisiratoriu e diffidenti ntê cunfrunti dû statu.

Nta l'urtimu dicenniu a chistu s'agghiunciru finòmini d'abbirsioni cuntra li pòpuli sèmiti (l' arabbi) e nun cristiani (n particulari musurmani) ntra li quali cci sunnu li stissi europei, comu l'arbanisi. St'attiggiamenti sunnu facirmenti misuràbbili ô nord unni di tempu arcuni cunsistenti minuranzi pulìtichi sunnu turnati a èssiri graputi sustinitrici di st'antichi tiurìi pseudoscintifichi e razzistichi ca pustulavanu l'esistenza di civirtati e pòpuli "supiriuri". Nun sunnu mmeci misuràbbili quantitativamenti ô sud unni nudda idìa xenofobba ricugghiu finora mai anchi cunsensi pulìtici.

Lu razzismu anti-ebbraicu, c'hàvi uriggini sturichi e riliggiusi cchiù antichi, sècunnu tanti ndaggini dimuscupichi cuntinua a esistiri n tutta Italia, sibbeni n formi menu manifesti.

Storia dû razzismu cuntra li siciliani e li miridiunali n geniri cancia

Nti l'anni (1870-1945) ntû munnu mpera lu «razzismu scentificu», e la cchiùparti di l'antrupòlugi e dî criminòluggi italiani (li cchiù famusi sunnu (Cesare Lombroso, Luigi Pigorini, Arcangelo Ghisleri, Guglielmo Ferrero, Enrico Ferri), e puru siciliani comu Giuseppe Sergi e Alfredo Niceforo ripètunu, scrìvunu e pùbbricanu ntê cunvegni italiani e ntirnazziunali ca li siciliani e li miridiunali hannu statu parzialmenti «cuntaminati» di geni d'origgini africana e câ cultura meridiunali evi primitiva e inferiuri. Sta conclusioni ha statu puru accittata dû cuvernu e dî politici italiani (atti dâ cummissiuni d'indaggini ntâ Sicilia dû 1876).

Li criminologgi cunchiusuru ca cù stu «fattu» s'avissi a spiegari la «natura viulenta» e la cultura «criminali» dî meridiunali. Stati miricani comu l'Alabama cunzideranu li siciliani «non-whites» e li suttapunnu a l'apartheid. A Ellis Island (New York) l'immigrati italiani venunu spartiti: italiani dû nord (janchi) di na banna, chiddhi dû sud di n'àutra. La Dillingham Commision dû senatu dî Stati Uniti (atti dû 1911) stabbilisci ca l'italiani dû sud nun sunnu uguali a chiddhi «janchi» dû nord e ca li siciliani hannu forti nfluenzi «nigroidi». Ntâ sta manera si spiega l'origgini dû preggiudizziu sia italianu ca munniali contru li meridiunali. Sta discriminazziuni ntâ vari modi dura dô 1890 ô 1940.

Rifirimenti cancia

  • Teti, Vito (1993) La razza maledetta - Origini del pregiudizio antimeridionale. Edizioni Manifestolibri.
  • Petracconi, Claudia. (2000) Le due civiltà. Settentrionali e meridionali nella storia d'Italia. Edizioni Laterza.
  • Stella, Gian Antonio (2002) L'Orda - Quando gli albanesi eravamo noi. Edizioni Rizzoli, Milano (Capitolo II°). ISBN 88-17-87097-8
  • Niceforo, Alfredo. Le due Italie - L'Italia barbara contemporanea (1898).
  • Lombroso, Cesare. Sulla inferiorità dei meridionali in Calabria.
  • Sergi, Giuseppe. Arii e italici. Attorno all’Italia preistorica, (1898) Torino, Ed. Bocca.
  • Sergi, Giuseppe. Origine e diffusione della stirpe mediterranea (1895) Roma, Ed. Dante Alighieri.
  • Prum, Michel (2000) Exclure au nom de la race (capitolo di Bénédicte Deschamps dal titolo «Le racisme anti-italien aux États Unis») Edictions Syllapse, Paris. ISBN 2-913165-15-X (in francese).
  • R. N. Bradley (1912) Malta and the Mediterrean Race, London 
  • B. Modestov (1907) Introduction a l’histoire romaine, Alcan, Paris.
  • Fairchild, Henry Pratt. Melting pot mistake.

Vuci currilati cancia

 
Commons
Lu Wikimedia Commons havi 'na catigurìa cca conteni media su Razzismu

Lijami esterni cancia