San Calojru

Calojru (Calcidonia, Tracia, 466 ca ? - Munti Croniu, Sciacca, 561 ca. ?) è un Santu viniratu dâ Cresia Cattolica e Ortudossa.

Aggiografìa

Lu nomu Calojru ca veni dû grecu e significa “ Beddu vecchiu “. Sta parola no sud d’Italia vosi nnicari li monaci rimiti, tantu ca alcuni studiusi dicinu ca fussi un rimitu senza nomi; avutri vonnu, comu lu Patri bullannista Papebrochiu (1743) ca si chiamassi Laununi Nericu. Pi quantu riguarda l’ebbica da sò nascita lu Patri Cajetani lu voli dû 313, di autri scrittura è cullucatu nò 466; di autri ancora nò VI seculu. Chiddu ca né vari seculi ha statu ed è oggettu di cultu è sulu chiddu ca stetti supra lu Munti Croniu supra Xacca (oj Sciacca).

Ne Menulògi Greci si leggi ô 18 Giugnu: “Memoria di Beati Patri nostri Calojru, Grigoriu e Demetriu no Craniu di Sicilia“. Stu Craniu è lu Munti Croniu o Craniu supra Xacca: o picchì ‘ntitulatu o diu Kronos (o Saturnu pi Rumani) o picchì avi a furma d’una testa.
Fu lu locu di un Monasteriu viscuvili; nsinu a vinuta di Nurmanni ci stava lu viscuvu di Trikala-Triocala, oj Caltabillotta. Lu Croniu è nu vastu ‘ntricciu di grutti naturali cu vapùri e acqui ricchi di idrogenu surfuratu. E’ supra l’antica Termi di Silinunti, funnata versu lu 628-650 di culòni ca vinianu di Megara Hyblaea. Tanti foru i Scrittura di Viti di Santi ca si occuparu di Calojru: lu Patri Ottaviu Caetani, lu Pirru, lu monacu Sergiu, Pilu, Cascini, Runzanu, Inveges, Fazellu, Massa, Frati Salvaturi Cappuccinu, Paulu Castelli, La Rocca, Simi, S. Grigoriu Papa. E tanti, nun havennu nutizii storichi, s’accuntintaru dâ tradizioni, da liggenna e fìciru puru errura grussulana.

Lu populu nà so fantasia pensa ca fussi njuru picchì vineva di l’Urienti.

Li vari virsioni esistenti

Sduppiannu o triplicannu i Santi Calojri avemu:

Lu primu

Lu primu, campò e tempi di San Petru , duranti lu periudu du ‘Mpiraturi Neruni (37-68); ebbi ordini di l’Apostulu di pàrtiri pâ Sicilia pi pridicari lu Vangelu e jttari fora i diavuli; ebbi pi Cumpagni i Santi Fulippu, Nofriu, Archiliuni e Syeru.

Lu secunnu

Lu secunnu, doppu essiri statu ‘n Pilligrinaggiu a Roma nò Papa Filici III (483-492), ebbi lu pirmissu di viviri na sulitudini. Si nni ju a Lipari (ME) e ci si truvava e tempi di Teuduricu (526). Custruìu na Cresia e libbirò l’isula di diavuli ca c’eranu, picchì era vicina ca vucca du ‘Nfernu (l’isula di Vulcanu); fici sgurgari acqui salutari (ca ancora oj su né Termi ditti di San Calojru). Comu scrivi lu Papa San Grigoriu Magnu né so Dialughi, lu jornu dâ morti di Teuduricu lu Calojru vitti lu Papa Giuvanni e lu Patriziu Simmacu jttari l’arma du Re dî Goti dintra lu crateri dû vulcanu. Doppu Lipari fu a Xacca e o Munti Croniu, unni campò trentacinc’anni e muriu no na data ‘mpricisata du seculu VII (Nutizzi pigghiati di l’anticu Briviariu Siculu-Gallicanu in usu in Sicilia du seculu IX o XVI).

Lu terzu

Lu terzu è chiddu du Munti Croniu. Unici ducumenti attendibili pa Vita dû Santu sunnu l’Inni di Sergiu, dittu Cranista, vali a diri dû Munasteriu supra lu Munti Croniu, vissutu versu l’870. L’Inni, scritti ‘n lingua greca, foru truvati nò Munasteriu di San Fulippu di Fragalà, in pruvincia di Missina, du Patri Ottaviu Caetani da Sucietà di Gesù. La Vita du Calojru discritta na sti Inni fa càdiri tutti l’atri discursi supra li vari Calojri, ca sunnu luntani da virità storica. Nautra funti è lu Briviariu Siculu-Gallicanu, dû tempu di Nurmanni.
Li dudici Litturi ca parranu du Santu Calojru sunnu da fini di l’XI seculu. Dû cunfruntu di dui funti storichi si ebbiru tanti quistioni ca oj sunnu supirati. Lu Patri Ottaviu Caetani fa nasciri lu monacu basilianu, dittu Calojru, a Calcidonia ‘n facci a Custantinopuli.
Pa pirsicuzioni scatinata dî Munufisiti contru li fideli ô Dogma Trinitariu pruclamato nò 451 nò Cunciliu di Calcidonia, ‘nsemmula ô Viscuvu Grigoriu e o Jacunu Demetriu scapparu dâ Tracia e sbarcaru a Lylibeu (oj Marsala), unni accuminciaru a pridicari lu Vangelu di Gesù Cristu.
Ma foru arristati e ammazzati pa fidi. L’auturi da loru morti pottiru essiri o li Munufisiti o li Vànnali d’Africa, ca eranu Ariani fanatici. Lu Patri Bullannista Danieli Paperbrokiu e l’Inni di Sergiu, fannu nasciri lu monacu Calojru a Cartaggini. Inveci di Chalkidonos trascrissiru Karchidonos e ficiru di Calojru un africanu, forsi puru pi prisintallu comu monacu latinu e nò urientali.
Calojru scappò e si rifuggiò supra lu Munti Croniu, ca era ‘nfistatu di diavuli. Li scacciò câ putenza dâ Cruci e si stabiliu dintra na grutta ca trasfurmò in Cresia nica. I Corpi di Santi Cumpagni Martiri, Grigoriu e Demetriu, foru sippilluti supra o Munti Croniu. Pari ca doppu lu martiriu di Grigoriu e Demetriu, Calojru girassi pi tutta la Sicilia e abitassi na l’antichi cimiteri o na cocchi grutta. Si ni fa memoria a Agrigentu, Naru, Salemi, Palermu, Catania, Fragalà, Saraùsa, Termini Imeresi, Licata, etc. Muriu all’età di circa novantacinc’anni, nò 561. Fu sippillutu na stissa grutta unni eranu i so dui Cumpagni.

Maiolica di San Calojru du 1545 na Grutta abitata du Santu supra u Munti Croniu, Xacca (AG)

Dintra a grutta c’è na maiolica di San Calojru dû 1545 e rapprisenta un rimitu ca varba ca avi nà manu gritta un libru e un ramu-vastuni; e so pedi c’è un fideli addinucchiatu e na cerva firùta di una freccia. La tradizioni voli ca lu Santu Calojru essennu troppu vecchiu, ricivìa lu latti di na cerva. Un jornu un cacciaturi di nomu Syeru, dittu Arcariu, picchì cacciava cu l’arcu, curpiù l’armali. Arricanusciu chiddu ca l’havia vattiatu tanti anni prima; ci dumannò pirdunu e Calojru lu purtò nâ grutta vapurusa, ci ‘nsignò a curari cu vapùri e l’acqui surgivi dû Munti e Syeru acchianava spissu supra a muntagna pi vidillu. Una matìna lu truvò mortu e lu sippilliu na grutta unni avìa dimuratu pi trentacinc’anni.

La tradizzioni ca si tramanna è veru diffirenti nni vari paisi, nfatti a Naru e a Girgenti la figura dû santu si tramanna comu chidda di n'òminu nìuru, mentri a Sciacca la figura dû santu è janca, chissi tri sù li cità unni lu santu è cchiù viniratu, e 'n tutti tri si fa na granni festa 'n sò onuri. San Calò è cunziddiratu un santu taumaturgu, zoè ca fa guariri di malatìi, e anchi pi chissu è viniratu veramenti assai.

Lu cultu

Pi Decretu dû Papa Clementi VIII (1536 - 1605) lu cultu di San Calojru e di Santi Grigoriu e Demetriu fu pirmissu na tutta a Sicilia e a Festa cilibrata lu 18 Giugnu.

Li festi

A Naru lu santu si fisteggia lu 18 di giugnu, anchi si li fistiggiamenti ancumèncianu lu 15 e finìscinu lu 25, la prucissioni dû 18 matina è veru carattirìstica pirchì tantìssimi fideli trascìnanu lu santu, misu 'n capu na slitta, ca si chiama stràula, pi vìi dû paisi purtànnulu cu na corda e gridannu di cuntìnuu "Viva Diu e San Calò", duranti la festa poi na gran massa di cristiani arrìvanu scanzi dî paisi vicini pi fari "lu viaggiu" a S. Calò; n'àutra tradizzioni tìpica dâ festa di Naru è ca li cristiani, ca spissu fannu na prumissa a lu santu, pòrtanu a fari binidiri a lu santuariu furmi di pani ca rapprisèntanu li parti dû corpu ca foru guaruti pî ntercissioni du taumaturgu. Anchi l'11 di jinnaru a Naru si fa na festa 'n onuri dû santu, pirchì nnû sèculu XVII sarbau lu paisi dû tirrimotu ca curpìu la riggiuni. A Girgenti lu santu veni purtatu 'n prucissioni nnû misi di giugnettu, e tìpicu dâ prucissioni di S. Calò di Girgenti è ca li cristiani tìranu pani addossu ô santu dî barcuna, chissu pi rievucari lu fattu ca lu santu firriava pî vìi dâ cità nnû pirìudu 'n cui c'era la pesti, e tutti si scantàvanu a scìnniri pi strata e ci tràvanu lu pani dî barcuna.

I Riliquii

Ê tempi quannu Sergiu scrissi l’Akuluthia (Ufficiu Liturgicu) i Riliquii eranu ancora no Munasteriu du Munti Croniu. Doppu a ‘nvasioni arabba, pi ‘mpidiri la profanazioni, nò 1490 foru purtati nò Munasteriu di San Fulippu di Fragalà vicinu a Frazzanò (ME) du monacu basilianu Urbanu di Nasu e nò 1867 nà Matrici di Frazzanò. Cocchi Riliquia nica è nò Santuariu du Munti Croniu a Xacca (AG) e na Cresia di San Calojru a San Sarvaturi di Fitalia (ME).

Bibbliografia

Ottaviu Caetani, Vite di Santi Siciliani Palermu pressu i Cirilli, 1657
Girolamu M.Morreale S.J San Calojru Xacca,1979
Breviariu Rumanu secunnu u ritu Gallicanu in San Calojru di Xacca,1975
A. Pettignanu S.Ruggeri San Calojru Storia du cultu a San Sarvaturi di Fitalia E. Nebros,1984
Canone, Kontakion e Inni dei Santi Calogero, Gregorio e Demetrio in Cranio di Sicilia