Zammù
Sutta lu nomu ginèricu di zammù si mettunu nzèmmula vari chianti, ca nun hannu currilazziuni butanichi particulari. Sti chianti, s'ammugghianu sulu pì lu fatturi arumaticu di li sò semi o di li sò frutti ca ponnu èssiri pistiati doppu essiccazzioni o videmma doppu èssiri pistati.
Li chianti di zammù cchiù diffusi sunnu: lu "zammù virdi", di la famigghia di li Apiaceae; lu "zammù stiddatu" (cu li frutti ca hannu na carattiristica forma a stidda), di la famigghia di li Illiciaceae; lu "zammù pepatu", di la famigghia di li Rutaceae. Tutti chisti hannu na prubbàbbili uriggini urientali.
Storia cancia
Lu zammù è unu di li spezzi cchiù antichi e usati nti li cucini dû munnu. La sò vera uriggini è scanusciuta. Sapemu pirò cu cirtizza ca già li Eggizzi, li Greci e li Rumani usavanu lu zammù comu cunnimentu dû poddu e dû verru e pi fabbricari viscotti diggistivi. N picca tempu si diffunnìu n tuttu lu bacinu di lu Miditirraniu e già nnû Mediuevu era parti principali di li deti di li principali populi europei, n manera particulari di li poviri cuntadini.
Gustu cancia
Lu zammù n ginirali havi nu gustu ca tenni ô duci e l'aruma assumigghia assai a chiddu dî semi di finocchiu cu nu sinturi di amenta. Lu ciàuru e lu gustu sunnu accussì forti e ntensi ca havi a èssiri usatu cu mudirazzioni picchì acchidunu pò cunzidirarlu nauseanti.
Usi e prupitati cancia
Esistinu na nfinitati di usi e di ricetti cû zammù. N brevi pirò putemu diri ca s'accumpagna bonu cu carni di poddu e di verru (comu lu usavanu li Rumani) e videmma cû cunigghiu, cu caci e virduri vari. Nti li paisi europei è nu ngridienti funnamentali pì turti e duci e cci sunnu na manata di licori a basi di semi di zammù. Ntra li cchiù famosi asciamu lu Pastis, l'Assenziu e l'Anisette n Francia; lu Raki, l'ouzo e l'Arrak n Grecia; lu Mistrà e la sambuca n Italia; lu Tutone n Sicilia. Tutti li licori cu zammù ponnu èssiri abbinati pirfittamenti cu pesci e frutti di mari e hannu la particolaritati di addivintari opachi quannu sunnu ajunciuti a l'acqua. Chistu picchì li sò ògghi essinziali sunnu sulubbili sulu n alcool.
Lu zammù havi videmma prupitati tirapeutichi cuntra li prubblemi ntistinali (arriduci lu lanzu, la diarrea, li spasmi ntistinali, li crampi a lu stòmacu); è usatu comu ngridienti n arcuni midicinali cuntra la tussi e ntâ midicina tradizzionali cinisi è cunzidiratu n'òttimu anticancru.