Carnivora

? Carnivora Èbbica dû fòssili: Paleocene - Ricenti
A manu manca: Feliforma A manu ritta: Caniforma
Classificazzioni scintìfica
Regnu: Animalia Filu: Chordata Classi: Mammalia Òrdini: Carnivora Bowdich, 1821

Li carnìvuri (Carnivora BOWDICH, 1821) sunnu n'Òrdini di mammìfiri ca àvi cchiù assai di 280 speci diversi. St'Òrdini si sparti nta du' suttòrdini: li canifurmi e li filifurmi, unni sunnu nchiujuti armali assai diversi, dâ baḍḍòttula ca pisa 30 grammi a l'alifanti marinu ca tocca li 4000 kg. Puru di cca si vidi l'adattabbilità di st'Òrdini, unni cci sunnu armali ca càmpanu 'n terra e autri ca su' quasi marini cumpleti.

Anatumìa e biuluggìa

Crozza e dintami

La crozza dî carnìvuri cancia a sicunna dû còmpitu; ntê filifurmi di sòlitu è cchiù curta, pi cuncintrari megghiu la forza d'avanti. Ntê canifurmi è cchiù longa.

Macari la dintami cancia assai, comu chiḍḍa dî licauna ca àvi denti tagghienti pi strazzari la carni quannu la preda è ancora viva e manciarisilla lesta lesta, prima ca ponnu agghicari autri pridaturi comu la jena, autru carnìvuru ca mmeci àvi janghi assai sbiluppati pi macinari l'ossa.

Propia li scagghiuna sunnu li denti cchiù mpurtanti pi st'Òrdini, adattati pi na vita di pridaturi, unni siḍḍu càpita ca unu di sti denti si rumpi, l'armalu po mòriri di dica.

Dieta

Comu dici lu nomu, l'armali di st'Òrdini su' quasi sulu manciatura di carni e pridatura ma, pi diri, autri mèmmira comu lu Panda giacanti, màncianu quasi sulu erba (ma è puru veru ca certi voti mancia pisci, ova e nzetti videmma). Autri sunnu onnìvuri, comu l'ursi e li vurpi. Autri màncianu sulu nzetti.

Evoluzzioni

Li primi Carnivora cumpareru â Mèrica dû Nord ammeri 65-55 miliuna d'anni arrè, appena doppu la scumparsa dî dinusauri. A ḍḍi tempi, li pridatura èranu riprisintati di l'Òrdini Creodonta, ma la megghiu adattabbilità di Carnivora purtau st'ùrtimi a vìnciri a cumpitizzioni.

Classificazzioni

• ÒRDINI CARNIVORA

• Suttòrdini Feliformia
  • Famigghia Eupleridae: 8 speci nta 7 gènira
  • Famigghia Felidae: 37 speci nta 18 gènira
  • Famigghia Herpestidae: 30 speci nta 13 gènira
  • Famigghia Hyaenidae: 4 speci nta 4 gènira
  • Famigghia Nandiniidae: 1 specia nta 1 gèniri
  • Famigghia Nimravidae
  • Famigghia Prionodontidae: 1 specia
  • Famigghia Viverridae: 32 speci nta 17 gènira

• Suttòrdini Caniformia
  • Famigghia Ailuridae: 1 specia nta 1 gèniri.
  • Famigghia Amphicyonidae
  • Famigghia Canidae: 35 speci nta 10 gènira
  • Famigghia Mephitidae: 10 speci nta 3 gènira
  • Famigghia Mustelidae: 55 speci nta 24 gènira
  • Famigghia Procyonidae: 19 speci nta 6 gènira
  • Famigghia Ursidae: 8 speci nta 4 gènira
  • Infraòrdini Pinnipedia o Suprafamigghia Phocoidea
    • Famigghia Odobenidae: 1 specia nta 1 gèniri
    • Famigghia Otariidae: 14 speci nta 7 gènira
    • Famigghia Phocidae: 19 speci nta 9 gènira

Lijami di fora

• (EN) Flynn et al: Molecular Phylogeny of Carnivora