Cecunatu
Peppi Gambuzza, canusciutu comu lu Cecunatu fu nu pueta sicilianu dâ secunna mità dû XVII sèculu. Nasciutu a Spaccafurnu, lu Cecunatu havìa na tali fama di pueta ca fu uggettu di na scummissa tra lu marchisi di Spaccafurnu e lu viciré di l'èbbica. La scummissa cunsistia nti nu duellu pueticu tra lu Cecunatu e Petru Fudduni, all'èbbica cunsidiratu lu cchiù mpurtanti pueta sicilianu viventi. Lu duellu chi abbinni ntô 1656 pi quantu si ni sapi fu vinciutu dû Cecunatu agghicatu apposta a Palermu, e pari ca fu la sula vota ca Petru Fudduni persi nu duellu pueticu.