Mammalia

? Mammìfiri
Diversi speci di mammìfiri
Classificazzioni scintìfica
Regnu: Animalia Filu: Chordata Suttafilu: Virtibrati (senza classificazzioni) Mammaliaformes Classi: Mammalia Linnaeus, 1758
Òrdini
Suttaclassi Multituberculata (estinta) Plagiaulacida Cimolodonta Suttaclassi Palaeoryctoides (estinta) Suttaclassi Triconodonta (estinta) Suttaclassi Eutheria (cumprinennu puru l'armali estinti)/Placentalia (nun cumprènniri l'armali estinti) Afrosoricida Artiodactyla Carnivora Citacea Chiroptera Cimolesta (estinta) Creodonta (estinta) Condylarthra (estinta) Dermoptera Desmostylia (estinta) Embrithopoda (estinta) Hyracoidea Insectivora Lagomorpha Litopterna (estinta) Macroscelidea Mesonychia (estinta) Notoungulata (estinta) Perissodactyla Pholidota Plesiadapiformes (estinta) Primates Proboscidea Rodentia Scandentia Sirenia Taeniodonta (estinta) Tillodontia (estinta) Tubulidentata Xenarthra Suttaclassi Marsupialia Dasyuromorphia Didelphimorphia Diprotodontia Microbiotheria Notoryctemorphia Paucituberculata Peramelemorphia Suttaclassi Monotremata Monotremata

Li mammìfiri (Mammalia L. 1758) sunnu na classi d'armali virtibrati ca usa aḍḍattari li so picciriḍḍi, ànnu lu corpu cummigghiatu di pila e sunnu endutèrmici (sangu caudu).

Li mammìfiri cùntanu circa 5.500 speci, 1.200 gènira, 152 famigghi e 46 òrdini. Li grannizzi vannu dî 3,5 cm di Suncus etruscus ê 30 m dâ balinòttira azzola.

Urìggini e evuluzzioni

Tutti li mammìfiri scìnninu dû stissu armalu, adunca sunnu monufilètici. Li Sinapsidi sunnu cunzidirati li prijinitura dî mammìfiri, ca camparu ntô Pirmianu (circa 280 miliuna d'anni arrè). Li primi mammìfiri èranu granni quantu li muderni surci taràntula e arristaru nichi puru pi tuttu li Misuzzòicu.

Doppu dâ scumparsa dî dinusauri allura li mammìfiri accuminciaru a stracanciari adattànnusi nta tutti li ngagghi eculòggici lassati vacanti dî rèttili estinti.

Tassunumìa e classificazzioni

La spartitina cchiù cumuni è chiḍḍa chi metti tri suttaclassi:

• Monotremata, mammìfiri primitivi ca fannu l'ova;
• Metatheria, mammifìri marsupiali, comu canguri e koala;
• Eutheria, mammìfiri mmistati, comu cani e baleni.

Carattìristichi

Piḍḍizza

La majurìa dî mammìfiri àvi lu corpu cummigghiatu di pilu o cumunca cu na linia di pilu ca cancia di specia a specia. Li pila sunnu di chiratina e ponnu aviri diversi funzioni:

• Rigulari la timpiratura curporia, addifinnennu l'armalu dû friddu accussì comu dû caudu;
• Mimitizzazzioni, comu câ tigri, unni li strisci fannu cunfùnniri lu pridaturi cu l'ammienti. Cci sunnu puru autri armali comu vurpi e lèbbiri, ca càncianu la piḍḍizza a sicunna dâ staggiuni, cunfunnènnusi câ nivi ntô mmernu;
• fari scantari li l'aggrissura, comu ntê muffetti;
• attrazzioni sissuali, unni nta certi sessi li pila ànnu lunghizzi diversi pi attràjiri l'autru, comu ntê liuna o ntê gelada;
• cumunicazzioni, grazzi ê mùscula addrizzeri, comu quannu ci arrizza lu pilu ê jatti quannu sunnu scantati o vonnu attaccari;
• òrgani tàttili, comu ntê mustazzi di jatti, cani e fochi, unni un pilu spicializzatu è cullijatu a certi tipi di ricitturi (miccanuricitturi)
• prutizzioni, comu ntê pila stracanciati di rizzi e porcuspini, ca pùncinu o ponnu èssiri allanzati pi spirtusari l'aggrissuri.
• li pila dû nasu e di l'auricchi, mmecci, prutègginu li mucusi e lu dintra dî corpi stranii.

Aḍḍattata

Li mammìfiri sunnu l'ùnici armali ca aḍḍàttanu li figghi armenu nzinu a quannu chisti nun ponnu manciari cosi sani. Lu latti veni datu ê picciriḍḍi passannu dî minni, unni dintra ànnu li ghiànnuli mammari, d'unni pigghia lu nomu la Classi.

Lu latti nesci dû titiḍḍu, unni si mpizza lu picciriḍḍu pi sucari. Li Monotremata sdannu picchì mmeci iḍḍi lu latti lu jèttanu sudannu e li picciriḍḍi si l'ànnu a alliccari. Lu nùmmaru dî minni cancia di specia a specia, passannu di dui comu ntê primati, nzinu a vintiquattru comu ntê tenrec.

Dintami

Li mammìfiri ànnu na dintami ditta ètirumorfa, voli diri unni tutti li denti ànnu na funzioni diversa:

• palitti, ca stràzzanu e rùsicanu;
• scagghiuna, ca nzìccanu;
• ganghi, janghi o moli, ca scafàzzanu.

Quasi tutti li mammìfiri càncianu denti di quannu sunnu nichi (denti di latti).

Cci sunnu mammìfiri senza denti, comu li furmiculeri, e autri ca ànnu cintinara di denti comu nta l'oduntuceti.

Auricchi

L'auricchi, o megghiu, li strutturi auriculari dî mammìfiri sunnu l'ùnici sistemi pi ascutari ca prisenta tri ussiceḍḍa: marteḍḍu, ncunia e staffa.

Sistema circulatoriu

Li mammìfiri sunnu armali endutèrmici, voli diri a sangu caudu e, comu l'aceḍḍi, ànnu lu cori spartutu a quattru càmmari, adunca ànnu na circulazzioni ditta cumpleta.

Muvimentu e rispirazzioni

L'arti sunnu attaccati di sutta ô corpu e nun di latu comu ê rèttili. A sta manera li mammìfiri ponnu cùrriri e sautari e la cascia turàcica nun àvi cchiù na funzioni mutoria e si po didicari tutta â rispirazzioni.

Distribbuzzioni

Li mammìfiri sunnu spannuti nta tutti l'habitat e cuntinenti, adattànnusi a tutti li tipi di clima, comu puru ê mari (tri classi di mammìfiri sunnu marini) e l'ariu (comu ntê Chiroptera).

• 
  Un liuni màsculu (Panthera leo)
• 
  Omu di Neanderthal, ricustruzzioni
• 
  N'omu (Homo sapiens) e na fera (Tursiops truncatus)
• 
  Orniturincu (Ornithorhynchus anatinus)

Talìa puru

• Lista di mammìfiri cumuni