Caltaggiruni

Caltaggiruni

Dittagghi: Stemma di Caltaggiruni
Muttu: Urbs Gratissima (Città bonu vuluta), La Riina dî Munti Erei
Nomu ufficiali:	Caltagirone
Riggiuni:	Sicilia
Pruvincia:	Catania
Cuurdinati:	37°14'0"N, 14°31'0"E Ammustra ntâ mappa
Superfici:	383,38 km²
Abbitanti:	35 709
Dinzitati:	93,14 ab./km²
Cumuni cunfinanti:	Vischiri, Gela, Grammicheli, Licuddìa, Mazzarinu, Mazzarruni, Miniu, Li Maccara, Niscemi, Chiazza , Sammicheli
CAP:	95041
Prifissu telefònicu:	0933
Situ ufficiali:	https://www.comune.caltagirone.ct.it/

Caltaggiruni (Caltagirone nnû talianu) è nu cumuni di 35 709 abbitanti dâ Città metrupolitana di Catania.

È luntana 68 km dû sò capulocu pruvinciali Catania e 195 km dû sò capulocu riggiunali Palermu. È lu quintu cumuni cchiù populatu dâ Città metrupolitana catanisi e lu primu pi grandizza tirritoriali. È ntrê 25 cumuna dâ Sicilia pi populazziuni e lu quintu pi grandizza. È sedi piscupali (Piscupatu di Caltaggiruni, nnû talianu Diocesi di Caltagirone) dû 1816. È capulocu di'n grandi cumprinsoriu tirrituriali, chiamatu nnû talianu Calatino e Sud-Simeto (macari canusciuti comu li paisa caltaggirunisa), chi è nnâ parti miridiunali di l'enti metrupolitanu di oji.

Centru urbanu misu centralmenti ntrâ Sicilia cintrali, chiḍḍa urîntali e lu liturali miridiunali, è celebri pâ pruduzziuni dâ ciramica, la quali la renni lu majuri centru riggiunali e unu dî cchiù mpurtanti d’Italia.

Fu pi ultra dui millenni nu puntu stratèggicu di cuntrollu pi assai populi chi contrullavanu li chiana di Catania e Gela, ntra di cui li greci, li bizzantini, l'arabbi, li ginuvisa, li aragunisa e li nurmanni. È vidè nu mpurtanti centru agriculu, pî so grandi campagni, comu Chianu Sampòlu, Costabbaira, lu Nuci, lu Mazzuni, Racineci e Rannasìa.

Lu centru storicu avi lu titulu di Patrimoniu di l’umanità UNESCO dû 2002, facenti parti dû consorziu du Vaḍḍ'i Notu, nzemmula ê città di Catania, Militeḍḍu, Scicli, Modica, Ragusa, Notu e Palazzolu.

L'etimoluggìa dû nomu diriva di l'àrabbu: si sapi chi la prima parola significa casteḍḍu (qal'at), ma l'àutra parti è di etimoluggia chi nun è canusciuta, e nun si sapi pi certu zoccu putissi significari; pi chistu mutivu, li studiusi, cchiù o menu titulati, ànu prupunutu assai significati, chi ponu purtari â storia greca (picciò Casteḍḍ'i Gela o Casteḍḍ'i gilisi), â storia midîvali (Casteḍḍ'i ginuvisi) u ô tirritoriu 'n quantu tali (Casteḍḍ'i grutti, Casteḍḍ'i cignali, Casteḍḍ'i quartari, ecc.)

Oji, ultra lu celebbri centru storicu, la città avi vidè n'area abbitata di età recenti, misa a sud-ovest, unni putemu truvari alcuni mpurtanti vî, palazzi, lochi e chiazzi centrali dâ città. Chista parti dâ città è oji lu cori urbanu dû cumuni, unni a majurìa dî pirsuni abbitanu (quasi 20 000 susu picca cchiù di 35 000 pirsuni).

La città mustràu sempri l'ambizziuni di essiri capulocu di na sò pruvincia chi fussi cchiù o menu lu tirritoriu dî paisa caltaggirunisi (Calatino e Sud-Simeto nnâ lingua taliana), accussì comu la vicina Gela chî sò paisi di l'area gilisi. È lu secundu centru dâ Sicilia cintrali cu cchiù abbitanti, dopu Cartanissetta e davanzi cumuna comu Caniattì, Dirnò e Castruggiuvanni.

Frazziuna

Pâ grandizza dû sò tirritoriu, Cartaggiruni avi diversi frazziuna, arcuni di chisti sunu luntani dicina di chilometri dâ città. Li cchiù canusciuti e mpurtanti sunu:

Granieri (frazziuni li cui abbitanti veninu dê cumuna dâ pruvincia di Ràusa)
Santu Petru (frazziuni ca si sviluppàu 'n facci ô boscu omonimu)
Chianu Sampòlu (frazziuni agricula a quarcu chilometru dû paisi)
Favareḍḍa (frazziuni li cui abbitanti sunu grammichilisi)

Giamillaggi

Ntrî parentisi sunu scritti o la riggiuni (nnû casu dâ Talia) o l'unità amministrativi fidirali si nnû paisi adintificatu asisti.

San Diego - Vinizzuèla (Carabobo)
Kallikrateia - Grecia
San Franciscu - Stati Uniti dâ Mèrica (Califurnia)
Arnsberg - Girmania (Nord Renu-Vistifalia)
Mdina - Malta
Bittilemmi - Autorità Nazziunali Palistinisi
Abbadìa Larana - Talia (Lummardìa)

Nasciuti a Caltaggiruni

Chista è na lista nun cumpleta di pirsuni chi nàppiru o crisciru a Caltaggiruni:

Don Luiggi Sturzu, parrinu, funnaturi dû Partitu Pupulari Talianu, sinaturi a vita dâ Ripubblica Taliana
Mariu Sturzu, frati di Luiggi Sturzu, piscupu di Chiazza
Carmelu Carìstia, diputatu dâ Ripubblica Taliana pâ Dimucrazzia Cristiana
Giambattista Fanales, diputatu dâ Ripubblica Taliana pû Partitu Comunista Talianu
Gnaziu Muntimagnu, piscupu di Girgenti
Juseppi Missina, riggista cinematograficu
Nnucenzu Marcinnò, riliggiusu
Francescu Parisi, senaturi dâ Ripubblica Taliana
Duminicu Semineriu, scritturi
Antuninu Raguna o Ràuna, studiusu dâ ciramica
Nicola Longubardi, gisuita missiunariu â Cina
Silviu Milazzu, puliticu già presidenti dâ Riggiuni Siciliana e funnaturi dâ Uniuni Siciliana Cristianu Suciali
Mariu Scelba, puliticu già presidenti dû Cunsigghiu dî Ministri dâ Rippubblica Taliana e vidè già Ministru dô Ntiriuri.
Gisualdu Climenti, medicu e prufissuri, già Magnificu Ritturi dâ Univirsitati di Catania
Saveriu Fragapani o Frâpani, architettu
Gualteru di Caltaggiruni, nobbili e puliticu dû periudu dî Vespri Siciliani
Ottavia Pinna Buscemi, pulitica, diputata dâ Assemblea Costituenti dâ Ripubblica Taliana pû Fronte dell'Uomo Qualunque
Salvaturi Castagna, ginirali militari
Paulu Ciuḍḍa, fàusaru di muneta
Marianu Giaquinta o Jaquinta, matimaticu
Jacupu Rannazzu, diriggenti sportivu, già presidenti dâ Atalanta Bergamasca
Alessiu Narbuni, gisuita e storicu
Mariu Sampirisi, jucaturi di palluni, difinsuri dû Monza
Nicole Grimàudu, attrici pû cinema e la televisiuni

Dialettu

Chiazza Umbertu I: si vidi la Cattidrali e lu Munti di Pietà

A Caltaggiruni, ntrê secula XIX e XX, in virtù di l’unificazziuni nazziunali e dâ diffusiuni di menza di communicazziuni di massa visiva e stampata, l’usu dâ lingua taliana si allargàu in quasi tutti l'abbitanti e vidé in registra diversi di chiḍḍi furmali. La lingua siciliana pirò è vidè presenti, nnâ sò varianti cittatina.

La so varietà lucali, lu caltaggirunisi, è 'n dialettu di transizziuni, chi avi elementa urîntali ( cunzidirati comu lìati ô catanisi, ma pigghiati dû missinisi) e èlimenta cintrali (famigghia di dialetta a unni appirtenunu chiḍḍi di Castruggiuvanni e Nissa). Avi forti nfluenza ligguri (prubabbilmenti savunisi).

Comu'n autri dialetta dû sicilianu, sunu prisenti nfluenzi dî lingui castigghiana, catalana, pruvinzali, bèrbira, tuscana e greca, ultra a prestiti dû talianu e vidè du nglisi.

Asempi scritti

Sutta ci stanu arcuni asempi scritti, lu primu è lu primu articulu da Dichiarazziuni Universali dî diritta di l'Omu dî Nazziuna Uniti, lu secunnu è lu prìara cristiana dû Patri Nostru, lu terzu è la fabbula dû Lupu e l'Agneḍḍu dû scritturi di fabbuli grecu Èsupu:

Dichiarazziuni Universali di li diritti di l'Omu

"Ì crìstijani nasciunu tutti lìbbiri e tutti ì stìssi, pi dignità e dirìtti.

C'ànu u stìssu ciribeḍḍu e cuscienza, e s'han'a cumpurtari 'ntra ri ìḍḍi comu si fussuru frati râ stìssa matri."

Patri nostru

Patri nostru, chi sï ndû cełu,

Santiffijatu vè u nommu tò,

vinìssi prestu u tò regnu,

sempri fatta vè a tò vułuntà,

comu ndû cełu accussi 'n terra.

Danni oggi u nostru pani cutidijànu,

e levini ì nostri debbita

'ccussï comu nuatri ì tugghìmu

ê debbitura nostri.

E nun ni bbannunari ndâ tentazzijoni,

ma lìbbirini dû màłi, AMEN.

Lu lupu e l'agneḍḍu di Ésupu

Un lupu e nu gneḍḍu, morti di sìti, jungìru a bìviri ô stìssu sciumi.

Ncapu v'era u lupu, cchiù sutta v'era u gneḍḍu.

Ḍḍura, ḍḍu disgranijatu dû lupu, chi c'avìa a panza vacanti, si circà a sciarra cû gneḍḍu e c'à dìttu:

-Disgranijatu, ti lèvi di ḍḍocu chi mi sta lurdannu tutta l'acqua!

E u gneḍḍu ci rispunnï:

-'Un ti siḍḍijari, vìri chi tò mi sta lurdannu l'acqua, chi passa prìma di tìa!

U lupu, ch'ava caputu chi v'era ḍḍu tortu, c'à dittu:

- He sintutu chi sï mìsi fa m'à sparratu cu l'ammìci!

E u gneḍḍu contrubbattï:

- Ma ìu sï mìsi fa mancu ava natu, chi mi sta dicennu?

E câ raggia dâ fami, prima di bbirarissìllu, c'à dittu:

- E ḍḍura à statu ḍḍu porch'i tò pa' a sparrarimi.

E dopu, senza mancu vìririci si l'à bbiratu e si l'à spurpatu tuttu sanu.

Sti paroli l'àn'a sentiri tutti i crìstijani chi cunnannunu ì nnucenti gnustamenti.

Pi sapìrinni cchiossai, vidi puru Cullina di Sant’Ippòlitu (Caltaggiruni).