Giuvanni da Procida

Giuvanni da Procida (Salernu, 1210Roma, 1298) fu un mèdicu di la Scola Salirnitana, diplumàticu e omu puliticu lijatu a la dinastia sveva di li Hohenstaufen e unu di li familiares di Manfredi. Doppu la cascata di la dinastia sveva, fu uno di li prutagunisti dî Vespri Siciliani.

Giuvanni da Procida

Fu mèdicu pirsunali di Fidiricu II di Svevia, assistìu a la morti di lu ‘mpiraturi (ntô 1250), ca cci arrijalò tanti terri ammeri Napuli, e ntra chisti l’ìsula di Procida. Fu appoi fidilissimu di Manfredi, cu la càrica di Cancilleri di lu regnu. Secunnu la tradizioni, prisenti – a lu 29 di uttùviru 1268 – nti la chiazza dû Mircatu di Napuli a la tagghiata di testa di Corradinu di Svevia, cugghìu lu guantu ca lu niputi di Federicu jittàu ntra la genti picchi qualchidunu cuntinuassi la lotta contru a l’Angiò. Ntra li esiliati di la casa di Svevia, Giuvanni da Procida vinni spudistatu e mannatu nti na nica ìsula cu stu nomu, misa nti la baia di Napuli. Di nòbili famigghia e di granni sapiri, appi granni cunfortu di la puvirtà di l’esìliu diticànnusi a la midicina. La furtuna nun cci avìa lassatu ca la vita e iddu la disprizziava; e lu disprezzu di la vita è la prima doti di nu ribeddi. Pussidìa macari l’arti di neguziari, di fari vàliri li so’ ragiuni e d’ammucciari li so’ scopi, e nti li soi tanti cuntatti cu pòpuli e genti sapìa cunvìnciri tutti ca lu so’ agiri era sulu nti lu ‘ntiressi d’iddi.

Lu Ribbillamentu dû Vespru sicilianu cancia

Era lu Lunidìa di l’Àngilu, a lu scurari: nu surdatu c’avìa urtraggiatu a na picciotta fu ammazzatu di la fudda ‘nfirucita. Lu ribbillamentu si spannìu tempu nenti nti tutta l’Ìsula, nti chidda ca fu la prima rivuluzioni di lu Secunnu Millènniu.

Pi stu ribbillamentu nasceru liggennni, foru scrivuti rumanzi e òpiri lirichi. Si trattò di nu ribbillamentu di pòpulu, di na summossa (spuntània, dìciunu certiduni stòrichi; pinzata cu tutti li dittagghi, secunnu àutri), contru a li supprusi di nu straneru, Carlu d’Angiò, ca nun si facìa vuliri beni, e di n’esercitu, chiddu francisi, ca facìa anghìrii di tutti li maneri. La ciamma s’addumò lu lunidìa 30 di marzu doppu Pasqua di l’annu 1282, a lu scurari (a lu vèspiru) (a un’ura di notti secunnu l’uràriu canònicu, picciò , era già lu 31 marzu).

Cunta accussì unu di li cchiù ‘mpurtanti stòrichi di lu Mediuevu, Edward Gibbon (‘n Storia di la dicadenza e cascata di lu Mpèriu Rumanu): «Mentri na prucessioni di citatini senz’armi visitava na crèsia fora di li mura, na nòbbili picciotta fu malamenti ‘nzurtata di nu surdatu francisi, ca fu pi sùbbitu misu a morti. Ntô primu mumentu lu pòpulu vinni dispirdutu di li surdati, ma lu nùmmiru e lu furori dû pòpulu appi la mègghiu, li cungiurati cughheru l’uccasioni, lu focu si sparpagghiàu pi tutta l’ìsula e ottumila francisi foru ammazzati nti na mattanza ginirali, a cui ci vinni datu lu nomu di Vespri Siciliani».

Suggistiva la virsioni di lu cchiù ‘llustri studiusu di tutta la vicenna, Micheli Amari ( nti La guerra dû Vèspiru Sicilianu, pubblicata nta la mità di l’Ottucentu): «Na picciotta di biddizza rara, di nòbbili purtamentu e mudestu, cu lu sò sposu, cu li cungiunti si nni ieva a lu tempiu».

Di la picciotta li cuntimpurrànii nun fìciru lu nomu, ma nu scritturi dû Seicentu la ricanuscìu comu madonna Benvenuta, figghia di nu certu Ruggieru Mastrangilu; àutri pinzaru ca si trattava di la nobbildonna Imelda, figghia di Giuvanni da Procida, ca fu mannata apposta di Napuli pi pruvucari lu fattu ca cci putissi pirmèttiri a lu sò patri di dari lu via a la rivolta.

Cuntìnua Amari: nu francisi, ca si chiamava Droetto, «Pi onta o licenza, a idda si fa comu a addumannari d’armi ammucciati, e cci duna na taliata; cci cerca lu pettu. Svinuta, cascàu ntê vrazza a lu sposu. Lu sposu, nìuru di ràggia : “Oh, mora, gridàu, mora na vota chisti francisi!”. E eccu di la fudda ca già s’alluntanava, s’allanza nu giùvani; pigghia a Droetto; lu disarma; l’azzicca ; fàcili ca iddu stissu vinni ammazzatu pi sùbbitu, senza ca si sappi lu so’ nomu e cu’ fussi , e siddu a armàrilu fussi l’amuri ca nutricava pi dda fìmmina ‘ngiuriata, forza d’ànimu nòbbili, o àutu pinzeri di dari lu via a lu riscattu. “Morti, morti a li francisi!”, gridarono;… La forza dû pòpulu si spannìu, e supraniò. Pi picca tempu s’eppi battagghia: granni la stragi dî nostri: ma èranu dui centu li francisi, e dui centu foru ammazzati».

Scòppiu spuntàniu di ràggia, nnunca, o disegnu priparatu?

Sicuramenti, muvimentu pupulari, e supra a chistu puntu tutti li stòrichi sunnu d’accordu. Supra a àutri si spartunu.
Micheli Amari appi la prioccupazioni d’appuggiari l’idìa secunnu cui “tutti” li francisi foru stirminati di la populazioni quasi ntô stittu mumentu. Un cantu pupulari dici: «‘nta n’ura fu distrutta dda simenza». Ma li cosi nun ieru accussì: lu massacru di l’occupanti vinni fattu nti un pirìudu di nu misi a lu chiossai o a lu cchiù picca, comu addimustra lu cuntu tramannatu ntê sèculi. Li francisi prisenti nti l’ìsula, quannu s’accurgeru di lu malu ventu ca tirava, s’ammiscaru ntra li siciliani, vistènnusi comu a iddi. Foru scupruti, a unu a unu, dicènnucci di diri la palora cìciri ca chisti, nun avennu la “c” palatali, dicèvunu kikiri (o sisiri), tradennusi nti l’orìgini. Lu difettu di la prununcia abbastò pi cunnannàrili a morti.

Pigghiannu pi bona l’idìa di na ’nsurrezioni spuntània, Micheli Amari dici ca nun ci fu nu capu di la rivolta. Áutri studiusi dìciunu ‘nveci ca chiddu ca succidìu lu lunidìa di Pasqua fu sulu la faidda pi na sullivazioni ca avìa statu priparata di li ghibillini, e ca appi ‘n Giuvanni da Procida lu sò capu.

Nu capupòpulu dû Vèspiru cancia

L’Ìsula, picciò, fu arrusbigghiata a lu sintimentu di libbirtà di la bona parlantina di Giuvanni da Procida ca urganizzò la rivolta di Palermu, priparànnula ‘n tutti li dittagghi, sprunannu (ntô 1281) la ntromissioni di lu ‘Mpiraturi Micheli Paleologo ‘n favuru di lu ‘nfanti Petru d’Aragona.
Gibbon dici ca Giuvanni cci misi dui anni pi purtari a cumpimentu l’òpira diplumàtica: «Travistutu di frati, o di mindicanti, lu ‘nstancàbili missiunariu di lu ribbillamentu curreva di Custantinopuli a Roma, e di la Sicilia a Saragozza».
N’àutru ‘mpurtanti stòricu dû Mediuevu, Steven Runciman , ammetti ca «Nti la primavera di lu 1282 tuttu lu munnu miditirràniu sapeva ca na crisi era vicina», mentri ca li siciliani «scuntenti, ‘nciammati di l’emissari aragunisi e fatti ricchi di l’agenti di Custantinopuli, cuntinuàvanu ammucciuni a cumpluttari la rivolta».
Àutri vuci dìciunu ca putissi èssiri ca Giuvanni da Procida si muvìu pi vinnitta, ca na so’ figghia «s’avìa ammazzatu lu stissu jornu di lu spusalìzziu, pi nun aviri l’affruntu di lu jus primae noctis di nu capitanu francisi ca alluggiava nti la so’ casa e ca sparti era fidìfragu picchì avìa fingiutu di dari lu sò cunzensu a ddi nozzi».
Lu valurusu medicu era prisenti nti la scena di lu “fattazzu” la sira di lu 30 marzu 1282. Accumpagnatu di li figghi Francescu e Tummasu, l’eroi dû Vèspiru guvirnò la summossa. La cità ‘n picca tempu vinni cunquistata. Li francisi, pigghiati a la ntrasatta, nun àppiru mancu lu tempu d’addifinnìrisi, ca, a gruppi, li ribbeddi cci foru ‘n coddu.
Davanti a lu ribillamentu sicilianu, Carlu d’Angiò non si detti pi persu. Iddu e li so’ eredi circaru pi quasi nu sèculu di ripigghàrisi la Sicilia, senza pirò ariniscìricci. Nu misi doppu li Vèspiri, s’arribbiddò macari Missina ca vinni misa sutta a nu longu assèdiu di li surdati francisi. L’8 austu di dd’annu foru dui fìmmini, Dina e Clarenza (sunnu aricurdati nti l’artìsticu rilòggiu di la Cattitrali), a addunàrisi di l’assartu dû nimicu e a avvisari li difinsuri di la citati. La liggenna voli ca ‘ntirvinìu macari la Modonna, prutittrici di la cità, a mèttiri Missina ô riparu dû so’ mantellu.
Cci fu nu tuntativu di midiazioni di nu missaggeru dû Papa, lu cardinali Gerardu di Parma, pi cunvìnciri li missinisi a arinnìrisi. Quannu chisti s’accurgeru ca lu Cardinali era mannatu di Carlu, ci dìssiru ca s’accuntitàvanu di mòriri, ma no di turnari sutta a lu so’ dumìniu. Petru III d’Aragona (cunziddiratu di li siciliani lu liggìttimu eredi ô tronu, avennu chistu maritatu la figghia di re Manfredi), Lu 30 austu sbarcò a Trapani, cunquistannu lu regnu senza luttari, grazzi a la Voluntas Siculorum. Lu 2 sittèmmiru, a Palermu, vinni acclamatu re di la fudda.
Tri anni doppu li Vèspiri, nisceru di la scena tutti li prutagunisti di la vicenna, è ristò sulu Giuvanni da Procida ca, numinatu Granni Cancilleri di Sicilia (a lu 2 di frivaru di lu 1283), murìu, all’etati di uttantott’anni, a Roma, nti lu 1298.

Ntô frattempu si cummatteva na longa guerra, durata novant’anni. Na speci di “storia ‘nfinita” ca fici macari scurdari a li siciliani lu mutivu ca l’avìa purtati a lu ribbillamentu di lu 1282. Si l’avìssiru aricurdatu sèculi doppu. Lu scrissi, cu granni chiarizza, Micheli Amari nti la prifazzioni di la so’ “Storia del Vespro” (Storia dû Vèspiru): lu libru «nascìu di li passioni ca agitàvanu la Sicilia avanti a lu 1848», accussì comu avìa succidutu 566 anni apprima.

Talìa macari cancia