Lingua siciliana e lingua taliana

La lingua siciliana (o lu sicilianu) è na lingua rumanza (neolatina) e mostra na granni simigghianza câ lingua taliana, essennu macari chista na lingua rumanza; assai simigghianzi havi macari cu àutri lingui appartinenti ê lingui rumanzi (Catalanu, Francisi, Corsu, Gallegu, Portughisi, Sardu, Spagnolu), ma pô mutivu dâ scularizzazioni ntô sèculu passatu dê pupulazzioni di lingua matri siciliana ndirizzata sulamenti a la lingua taliana, oggi la simigghianza cô talianu (tuscanu littirariu) è assai cchiù forti ca ntô passatu. Pri tutti ssi mutivi, la traduzzioni "autumàtica" è pussìbbili, ma sulu 'n parti, picchì macari ca la lingua siciliana è na lingua latina, mèritanu di èssiri suttaliniati sti tri punti:

la storia dâ lingua siciliana è cchiù vecchia ancora di quannu agghicau lu latinu 'n Sicilia;
àutri lingui urigginari siciliani e nun-latini vìnniru parrati ntôn modu assai difunnutu;
pâ sò pusizzioni giugràfica, la Sicilia hà attraiutu nta l'èbbichi passati quasi tutti li pòpuli dû Miditirràniu. Ortri a lu latinu e lu talianu, s'attròvanu cchiù o menu tracci di tutti sti lingui: lu grecu, l'àrabbu, lu francisi, lu lummardu, lu alimannu, lu pruvinzali, lu catalanu, lu spagnolu.

Lu vucabbulàriu

La lingua siciliana havi tanti palori ca addirìvanu, comu ô talianu, dô latinu, ma havi macari assai palori ca addirìvanu di àutri lingui.

talianu	sicilianu
anche	macari
dove	unni
lavoro	travagghiu
molti	assai

Grammàtica

L'artìculu

Dô latinu "unus", l'artìculu non diterminativu talianu addiventa un/uno, mentri ca 'n sicilianu è un/nu/unu; "unas" 'n latinu, e 'n talianu una , 'n sicilianu è una/na .

Dô latinu "ille/Illum", l'artìculu diterminativu talianu addiventa il/lo e ntô sicilianu lu sò aquivalenti è lu . "Illam" latinu, ca ntô talianu è la, currispunni macari 'n sicilianu cu la. Ntô talianu asìstinu pô prurali artìculi diffirenti: i, gli pî sustantivi di gèniri maschili, le pî fimminili. 'N sicilianu, c'è sulamenti n'artìculu li. 'N tutti li dui lingui, l'artìculu difinitu di singulari davanti a na vucali è arridduciutu a l'. .
L'artìculi partitivi asìstinu 'n tutti li dui lingui. Li fùrmanu tràmiti la pripusizzioni di.

Diclinazzioni

'N tutti li dui lingui si fòrmanu li casi pi mezzu di li pripusizzioni:

Li pripusizzioni da e di . 'N sicilianu, la pripusizzioni di currispunni ê pripusizzioni taliani da e "di". La siciliana di l' currispunni ê formi taliani dell (l'artìculu difinitu ntra di e na vucali). Li formi siciliani di lu, di la (aquivalenti ê taliani del, della) sunnu arriduciuti ô spissu a dû, dâ. La forma prurali di li (aquivalenti ê taliani dei, degli, delle) - a dî.

La pripusizzioni a. 'N sicilianu a nun pigghia la facci ad davanti a na vucali. La siciliana a l' currispunni a li formi taliani all' , (l'artìculu difinitu ntra a e na vucali). Li formi siciliani a lu, a la, (equivalenti di li taliani al/allo, alla) sunnu arriduciuti spissu a ô, â. La forma di prurali a li (aquivalenti di li taliani ai, agli, alle) - a ê.

La pripusizzioni in. 'N sicilianu, 'n o nta currispùnninu a la palora taliana in. La siciliana nta l' currispunni a li formi taliani nell' (l'artìculu difinitu ntra in e na vucali). Li formi siciliani nta lu, nta la (aquivalenti a li taliani nel/nello, nella) sunnu arriduciuti spissu a ntô, ntâ. La forma di lu prurali nta li (aquivalenti a li taliani nei, negli, nelle) - a ntê.

La pripusizzioni per. La palora siciliana pi , e davanti a na vucali - p' , currispunni a la palora taliana per.

La pripusizzioni con. La palora siciliana cu , raramenti cun, currispunni a la palora taliana con.

La pripusizzioni su. La palora siciliana supra ca nun è unita cu l'artìculu, currispunni a la palora taliana su. P'asempiu, li palori taliani sul/sullo, sulla hannu 'n sicilianu li formi supra lu, supra la, ecc.

La pripusizzioni tra. La parola siciliana ntra currispunni a la parola taliana tra.

Li pripusizzioni sèmprici

talianu	sicilianu
di	di
a	a
da	di
in	'n o nta
su	supra
con	cu
per	pi o pri
fra	tra o ntra
tra	tra o ntra

Sulamenti arcuni di li pripusizzioni sèmprici fòrmanu n'ùnica palora cu l'artìculu:

Li pripusizzioni articulati siciliani

	li (le)	lu (lo)	la
di	dî	dû/dô'	dâ
a	ê	ô	â
cu	chî/chê	cû/cô	câ
pi	pî/pê	pû/pô	pâ
nta	ntî/ntê	ntû/ntô	ntâ

Li pripusizzioni articulati taliani

	il	l'	lo	la	i	gli	le
di	del	dell'	dello	della	dei	degli	delle
a	al	all'	allo	alla	ai	agli	alle
da	dal	dall'	dallo	dalla	dai	dagli	dalle
in	nel	nell'	nello	nella	nei	negli	nelle
su	sul	sull'	sullo	sulla	sui	sugli	sulle

Li cunciunzzioni

'N talianu la "e" e la " a" davanti a na vucali addivèntinu "ed" e "ad", mentri ca 'n sicilianu arrèstanu "e" ed " a", senza la junta dâ "d".

L'aggettivu

L'avverbiu sicilianu cchiù currispunni a l'avverbiu talianu più, sirvennu â furmazzioni di lu cumparativu di supiriuritati.

Lu verbu

Li verbi taliani ca accumìncianu cu di-, ri- 'n sicilianu sunnu priciduti pi ad- o ar -. P'asempiu, t. divenne - scn. addivinni.

La cuniugazzioni di li verbi ausiliari (arcuni formi)

Lu verbu "essere - èssiri"
talianu	sicilianu	La furma grammaticali
essere	èssiri	nfinitu
è	è	prisenti nnicativu, terza pirsuna, singulari
sono	sunnu	prisenti nnicativu, terza pirsuna, prurali
è stato	havi statu	passatu pròssimu nnicativu, terza pirsuna, singulari
sono state	hannu stati	passatu pròssimu nnicativu, terza pirsuna, prurali
era	era	mpirfettu nnicativu, terza pirsuna, singulari
erano	èranu	mpirfettu nnicativu, terza pirsuna, prurali
sarebbe	vinissi a; avissi	cunnizziunali prisenti, terza pirsuna, singulari

Lu verbu "avere - aviri"
talianu	sicilianu	La furma grammaticali
avere	aviri	nfinitu
ha	havi	prisenti nnicativu, terza pirsuna, singulari
abbiamo	avemu	prisenti nnicativu, prima pirsuna, prurali
hanno	hannu	prisenti nnicativu, terza pirsuna, prurali

La furmazzioni di arcuni furmi di verbi

'N ginirali, li verbi siciliani si cuniuganu 'n modu cchiù rigulari ca li sò equivalenti taliani, p'asempiu: t. tradotto - scn. traduciutu.

Ntô caso unni lu cumprimentu servi di prunomi pirsunali juciutu cô verbu, 'n sicilianu lu prunomi si scrive â fini dû verbe, senza canciari furma ô verbu, signannu l'accentu unni iddu casca, p'asempiu: it. dargli - scn. dàricci. Lu stissu succedi cô prunomi pirsunali rifressivu si, per esempio: it. darsi - snc. dàrisi.

Lu sicilianu, -ìa- currispunni a li gruppi taliani -eva-, -ava- e -iva- 'n mperfettu, p'asempiu: t. potevano - scn. putìanu, t. proponeva - scn. prupunìa.

'N sicilianu, la tirminazzioni -au currispunni a la tirminazzioni -ò 'n terza pirsuna di singulari di passatu sìmprici (prima cuniugazzioni): t. approvò - scn. approvau.

'N sicilianu, la tirminazzioni -amu, (prima cuniugazzioni), o -emu) (secunna, terza cuniugazzioni), currispunni a la tirminazzioni -iamo 'n prima pirsuni di prurali di prisenti: t. osserviamo - scn. ussirvamu, t. definiamo - scn. addifinemu.

'N sicilianu, si forma lu passatu pròssimu nnicativu (cumpostu) cchiuttostu tràmiti lu verbu ausiliari "aviri" ca "èssiri".

Lu prunomu

Li prunomi pirsunali

La palora siciliana iddu (prurali iddi), currispunni a li prunomi taliani di terza pirsuna singulari di gèniri maschili egli, lui, esso.

Li prunomi pussessivi

Sulamenti un prunomu sicilianu sò currispunni a li prunomi pussessivi taliani di terza pirsuna (suo, sua, suoi, sue, loro).

Li prunomi dimustrativi

Li prunomi dimustrativi stu, sta, e davanti a la palora accuminciata di na vucali - st' currispùnninu ê prunomi taliani dimustrativi questo, questa ecc.

La palora siciliana chistu currispunni a li prunomi di lu sustantivu questo, ciò.

La palora siciliana ci currispunni a lu prunomu pirsunali talianu gli.

Li prunomi rilativi

Lu prunomu rilativu sicilianu chi, riduttu davanti a na vucali, currispunni a lu prunomu rilativu talianu che. La palora ca currispunni a la palora che comu cunciunzzioni.

L'avverbiu

L'avverbi spissu ncuntrati (paraguni):

talianu	sicilianu
dove	unni
molto	tantu
poi	appoi
quando	quannu

'N sicilianu, accussì comu a lu talianu, si fùrmanu macari l'avverbi pi mezzu di tirminazzioni -menti (talìa "Li suffissi").

Li diffirenzi di urtugrafìa

Li diffirenzi di urtugrafìa arrisurtanu dê diffirenzi di prununcia.

L'accentuazzioni di l'accenti

Ntê palori siciliani, ginerarmenti, l'accentu casca ntâ stissa sìllabba di l'aquivalenti palora taliana. 'N sicilianu, siddu l'accentu nun casca ntâ penùrtima sìllabba (p'asempiu: ntê palori di etimoluggìa greca tirminanti pi -icu, -ica ecc.), si segna la vucali accentata, p'asempiu: t. tecnica - scn. tècnica, t. via - scn. vìa.

Li diffirenzi dê littri e dî gruppi di littri

La littra nun accintata o 'n talianu si trasfurma ntâ littra nun accentata u 'n sicilianu. L'accentata o nun subbisci canciamenti 'n sicilianu. Stu principiu havi li eccezzioni, tuttavìa si ponnu ussirvari arcuni rigularitati:
- 'N sicilianu, la littra u currispunni ntâ tirminazzioni a la littra taliana nun accentata tirminali o.
- 'N sicilianu, la littra u currispunni a la littra taliana accentata o davanti a r, quannu chista veni prima di na vucali, p'asempiu: t. onore - scn. onuri, t. allora - scn. allura.
- 'N sicilianu, la littra u spissu currispunni a la littra taliana o nta li paroli monosillàbbichi, p'asempiu: t. non - scn.nun.
La littra nun accentata e 'n talianu, si trasfurma 'n sicilianu ntâ lttra nun accentata i. L'accentata e 'n talianu, nun havi canciamenti 'n sicilianu. Stu principiu havi l'eccezzioni, tuttavìa si ponnu ussirvari arcuni rigularitati:
- 'N sicilianu, la littra i currispunni ntâ la tirminazzioni â littra taliana nun accentuata tirminali e.
- Nta l'aggettivi di nazziunalitati, la tirminazzioni siciliana -isi o -isa, secunnu lu gèniri (màsculu o fìmmina), currispunni a la tirminazzioni taliana -ese, p'asempiu: t. catanese (màsculu o fìmmina) - scn. catanisi (màsculu) , catanisa (fìmmina).
Lu dittongu talianu uo si trasforma ntô sicilianu o, p'asempiu t. nuova - scn. nova, t. uomini - scn. òmini. Stu princìpiu, pirò, nun si àpprica quannu la u dô dittongu uo è siguitata dâ tirminazzioni -ono 'n secunna pirsona prurali prisenti, p'asempiu: it. seguono - scn. sequinu.
Lu gruppu di littri talianu ea si trasforma 'n ia 'n sicilianu, p'asempiu: t. reale - scn. riali. Ntô stissu modu succedi cu àutri gruppi di littri cu e e na vucali: t. teoria - scn. tiurìa.
Lu gruppu talianu ns si trasforma 'n nz 'n sicilianu, p'asempiu: t. considerato - scn. cunzidiratu, t. senso - scn. senzu.
Lu nessu talianu nd si trasforma 'n nn 'n sicilianu, p'asempiu: t. quando - scn. quannu.
Lu nessu talianu mb si trasforma 'n mm 'n sicilianu, p'asempiu: t. bambino - scn. bamminu.
'N sicilianu, spissu veni aliminata la nizziali latina i, p'asempiu: t. importante - scn. mpurtanti.
Lu raggruppu sicilianu qu currispunni a lu gruppu talianu gu dopu e, davanti a na vucali, p'asempiu: t. prosegue - scn. prusequi.
Lu raggruppu sicilianu nc currispunni a lu gruppu talianu ng davanti e o i.
Lu raggruppu sicilianu ase- currispunni a lu gruppu talianu nizziali ese- , p'asempiu: t. esempio - scn. asempiu.
'N sicilianu, r currispunni a la littra taliana l dopu li cunzunanti b, p, r o davanti a li cunzunanti c, m, p, t , p'asempiu: t. parlare - scn. parrari, t. attualmente - scn. attuarmenti, t. semplice - scn. sìmprici, t. alcuni - scn. arcuni. Li eccezzioni: t. altro - scn. àutru (u currispunni a la littra taliana l), t. Irlanda - scn. Irlanna.
Lu raggruppu sicilianu gghi currispunni a lu gruppu talianu gli (ma nun a l'artìculu), p'asempiu: t. famiglia - scn. famigghia.

Raddoppiu di li cunzunanti

La littra taliana g dopu na vucali, davanti a i o e, si raddoppia 'n sicilianu, p'asempiu: t. ragione - scn. raggiuni.
La littra taliana z dopu na vucali, davanti a i o e, si raddoppia 'n sicilianu, p'asempiu: t. polizia - scn. pulizzìa.
La littra taliana b dopu na vucali, davanti a i, e o r, si raddoppia 'n sicilianu, p'asempiu: t. liberale - scn. libbirali. Chistu nun sarva lu raggruppu mbr : t. membro - scn. mèmmiru.

Li prifissi e li suffissi

Li prifissi

talianu	sicilianu
auto-	auto- autu-
con-	cun-
de-	di-
in-	n-
inter-	ntir-, nter-
pro-	pru- (pro- unni l'accentu casca a sta sìllabba)

Li suffissi

talianu	sicilianu
-bile	-bbili (l'accentu a la stissa vucali, comu 'n talianu)
-logia	-luggìa
-mente	-menti
-ore (asicuturi di attivitati, singulari) -ori (prurali)	-uri -ura
-tà	-tati
-zionale	-zziunali -ziunali (dopu na cunzunanti)
-zione	-zzioni -zioni (dopu na cunzunanti)