Lingua suvradialittali

Na lingua suvradialittali è na sìntisi urali o scritta di li principali parrati di na lingua ca è 'n cursu d'unificazzioni, sia di l'usu ca si nni fà, sia di la pulìtica culturali di nu Statu.

'N ginirali doppu la furmazzioni di na lingua suvradialittali, si virìfica n'apirtura prugrissiva dâ lingua scritta unificata â lingua parrata e supra d'idda nfatti nasci na lingua littiraria vicina a lu pòpulu e, addattànnusi, è ùtili appoi â diffusioni di lu sapiri mudernu e dû prugressu, e chistu fà emèrgiri un vucabbulariu pulìticu, suciali e tècnicu.

Lingua siciliana

'N Sicilia, esisti na cuscenza dialittali ca pirmetti a ognunu d'arradicàrisi a un tirritoriu linguìsticu ristrittu, ma esisti puru na cuscenza supradialittali chi pirmetti a tutti li siciliani di ricanùsciri la "lingua siciliana" (nzemi di li parrati siciliani) senza pinzari a li diffirenzi.

Lu sicilianu è na lingua ca cumprenni nu munzeddu di varietati (funètichi) e pirchissu abbisogna n'ortugrafìa suvradialittali comu nn'esisti già pi àutri lingui europei sia riggiunali (brètuni, bascu, occitanu) ca nazziunali (talianu, francisi).

Puru siddu li parrati siciliani càncianu di paisi a paisi, la lingua siciliana ci havi na basi lissicali cumuni (ca veni supratuttu dû latinu mediuevali, ma puru dû grecu, di l'àrabbu, di lu spagnolu, di lu nurmannu, ecc.) e dunca ci havi n'unifurmitati sustanziali. Midemma la raffinatizza e la diffusioni di sta lingua dirìvanu di fatturi sociu-culturali mpurtanti cumuni.

Si poti diri ca lu sicilianu ca la maiuranza di li littirati siciliani scrìvinu è na lingua suvradialittali pirchì li furmi siciliani ca ùsanu sunnu spissu li furmi cchiù diffusi 'n Sicilia, e puru siddu sti scrittura siciliani sunnu di pruvinci diversi, iddi scrìvinu nta modi sìmili tra d'iddi.

Supra stu "sicilianu cumuni" putìssiru appuntàrisi 'n particulari li pruggetti di nurmalizzazzioni e furmalizzazzioni di la lingua siciliana suvradialittali ufficiali (ditta "Lingua siciliana unificata"), ca dispunissi di nu standard ortugràficu ufficiali ricanusciutu pi liggi di l’Assimbrea Riggiunali Siciliana.

St'ortugrafìa siciliana suvradialittali (ca pi camora nun è ufficiali) è comu chidda ufficiali di l'àutri lingui rumanzi basata supra l'etimoluggìa, la morfuluggìa e la dirivazzioni.

Ntô futuru, l'istituzzioni culturali, pulìtichi e accadèmichi dâ riggiuni siciliana putìssiru cuinvurgìrisi nta un dibbàttitu granni supra la lingua siciliana.

L'occitanu, la lingua di li truvaturi

La lingua di li "troubadour" (truvatura) è na koinè supradialittali, na lingua cu elementi dirivati di diversi dialetti e accittata di li pueti comu veìculu dâ puisìa lìrica.

Nta l'occitanu vèninu distinti cincu gruppi dialittali: lu limusinu, l'alvirniati, l'alpinu-dilfinatisi, lu linguadocianu, e lu pruvinzali 'n senzu strittu (zoè parratu nta l'antica cuntea di Pruvenza).

Lu talianu, na lingua suvradialittali

'N Italia esìstinu dui rialitati linguìstichi: li dialetti e lu Talianu. L'accussidditti dialetti sunnu spissu n'evuluzzioni diretta dû latinu (quinni 'n rialità veri e propi lingui) avvinuta ntê vari riggiuni. Lu talianu nveci è na lingua standard supradialittali (dirivata dû tuscanu dû '300 e cu àutri elementi linguìstici) ca fu "scigghiuta" grazzi a lu successu littirariu di Dante, Petrarca e Boccaccio.

Tanti lingui suvradialittali

Difattu assai lingui sunnu di li lingui suvradialittali:

lingua francisa, ammiscata scritta e urali di diversi parrati di la riggiuni di Pariggi.
lingua taliana, ammiscata scritta e urali di diversi parrati fiurentini e di furmi siciliani (dâ Scola siciliana) tuscanizzati.
lingua friulana, ammiscata dû friulanu cintrali (udinese) cu àutri parrati friulani cchiù nichi
lingua corsa (unificata), ammiscata scritta di diversi parrati corsi.
lingua sarda (LSC), ammiscata scritta di diversi parrati sardi.
lingua occitana, ammiscata scritta e urali dî parrati diversi dû sud dâ Francia
lingua arpitana (Ortugrafìa di Rifirimentu B ORB), ammiscata scritta di parrati diversi di li zoni alpini
lingua ebbràica, ammiscata scritta e urali di diversi parrati ebbràichi d'Europa e di lu Mediu Urienti.
lingua giappunisa, ammiscata scritta e urali di diversi parrati giappunisi.
ecc.

Liami nterni

Lingua siciliana