Franciscu Buccheri, saputu sèntiri 'n arti Cicciu Boley, nascìu a Catania ntô 1878 e murìu ntô 1961. Fu pueta di lingua siciliana, rapprisintannu l'arma cchiù vera e ginuina dô catanisi, sempri prontu a muttiari, prontu a lu sgherzu e nta lu stissu tempu a l’ammunimentu.

Cu tuttu ca la sò pupularità era assai granni e àuta e ca era dâ stissa èbbica di àutri mpurtani pueti catanisi comu a Formisanu, Scandurra, Marinu e Battiatu, nuddu di li ntillittuali di tannu nni parrava. Quarchidunu s'arrisicava a abbuzzari quarchi sò pupulari rima, ma nenti di cchiù e tantu pi fari capiri di non èssiri gnuranti; ma li rimi umurìstichi di Cicciu Boley pigghiaru pedi comu nuddu putìa pinzari, tantu ca lu pueta appi a scrìviri macari di notti.

Pê sò puisìi pungenti, a voti aspri, ma macari precisi e pinitranti nta la brivitati, iddu era diversu e ùnicu 'n cunfrontu di tutti l'autri sàtiri dâ rima e lu granni pùbbricu ca lu liggeva l’avìa caputu. Boley ridìa di l'àutri picchi sapìa rìdiri di iddu stissu.

Asèmpiu dâ sò puisìa cancia

Lu Diotru di lu Chianu

Lu Diotru di lu Chianu
com'è misu, veramenti,
mi scusati si lu dicu,
non mi pari giustamenti!
Lu vurrissi ca guardassi
non la nostra Catidrali,
ma lu nostru gran Palazzu
cusìdittu Cumunali!
Ccu la funcia sò jsata
notti e jornu dici a tutti:
- Citatinu, fila drittu,
si li jammi non vo' rutti!
Sugnu bonu, sugnu caru,
ma si viju cosi storti,
a cu' sbagghia, ccu 'sta funcia,
cci li dugnu...forti forti!
Si moru ju, ccu n'autri cent'anni,
non vogghiu fattu nuddu monumentu
comu si stila ccu li genii granni,
pirchì pueta granni non mi sentu!
Voggh'èssiri, precisu, vurricatu
sutta la funcia di lu Liafanti:
di lu cullega miu malasurtatu,
pri ricurdari a tutti li passanti
chi a trenta metri di la Porta Uzeta,
all'umbra di 'sta funcia prizziusa,
riposa un mudistissimu pueta
ch'à datu corpa a tutti, a la rinfusa.