Usu dâ «SCI» mmeci dâ «SS»

Ntô sicilianu parratu la «SS» poti vèniri stracanciata 'n «SCI».

Diffusioni

Stu finòminu s'attrova nta vari àrii di la Sicilia, e arcuni autura siciliani famusi ùsanu a li voti stu modu di scrìviri «SCI».

Asempi

• càssa -> càscia
• gràssu -> gràsciu
• pròssimu -> pròscimu
• bàssu -> bàsciu, vàsciu
• Còsimu, Còssimu -> Còscimu
• gràssa (dû spagnolu "grasa" ch'è prununzatu "gràssa") -> gràscia
• grassura (=fumeri, cuncimi) -> grasciura
• Lissandru -> Lisciànniru
• bardassa -> bardascia
• mbussulari -> mbusciulari
• "messon" (palora francisa antica) o "moisson" (palora francisa muderna) -> mesciuni, misciuni
• bussu (buxus) -> busciu
• cussinus (palora latina) -> cuscinu (chiumazzu)

ecc.

Nu finòminu prisenti nta àutri lingui

Ci voli nutari ca stu finòminu funèticu nun è tìpicu sulu dû sicilianu, pirchì asisti nta àutri lingui neolatini, comu p'asempiu la lingua napulitana ca havi la furma:

'o popùle vascie (zoè 'n sicilianu: "'u pòpulu vasciu")

ecc.

E midemma ntâ lingua asturiana:

coxín (prununzatu "coscìn", zoè 'n sicilianu: "cuscinu"), dû latinu "cussinus"

ecc.

E macari ntâ lingua taliana:

cuscino (zoè 'n sicilianu: "cuscinu"), dû latinu "cussinus"

ecc.

Ntâ littiratura siciliana

• Dî pruverbi cugghiuti di Giuseppi Pitrè:

Quantu va n'amicu 'n chiazza, 'un cci va cent'unzi 'n cascia.

• Cu troppu si fidò ristò 'ngannatu di Ninu Martogliu:

non sugnu muru vasciu vi 'ngannati;

Sicilianu standard usatu ntâ wikipedia

Nun avemu nudda prifirenza, si poti usari l'una o l'àutra.